Pavlodar oblysynyń ákimi Asaıyn Baıhanov óńirden kóship jatqan halyqqa qatysty óz pikirin bildirdi, dep habarlaıdy Dalanews.kz Informburo.kz-ke silteme jasap.
Ákimge bul saýaldy qoıǵan jýrnalıs bıylǵy jyldyń alǵashqy 10 aıynda Pavlodar oblysynan 6 myńnan astam adamnyń ketkenin atap ótti. Osyǵan jaýap bergen óńir basshysy máseleniń kúrdeli ári júıeli sıpatqa ıe ekenin aıtty.
"Bul suraqqa ústirt jaýap berý múmkin emes. Sebebi bul – biz qazir jumys istep jatqan negizgi júıeli problemalardyń biri", – dedi Asaıyn Baıhanov.
Oblys ákiminiń aıtýynsha, halyqtyń kóship ketýiniń basty sebepteriniń biri – ekologıalyq ahýaldyń nasharlyǵy. Pavlodar oblysy el boıynsha zıandy shyǵaryndylar kólemi jóninen birinshi orynda tur.
"Elimiz boıynsha jyl saıyn atmosferaǵa 2,1 mıllıon tonna qatty bólshek shyǵarylady. Sonyń 30 paıyzy nemese shamamen 700 myń tonnasy Pavlodar oblysynyń úlesine tıesili", – dedi ol.
Ásirese, shyǵaryndylardyń negizgi bóligi Ekibastuz qalasyna tıesili. Munda iri energıa óndirýshi kásiporyndardyń jumysyna baılanysty jylyna shamamen 400 myń tonna zıandy qaldyq aýaǵa taraıdy.
Sonymen qatar, ákim kóshi-qon kórsetkishterin tek ketýshiler sany arqyly ǵana emes, óńirge kelýshiler sanymen birge qarastyrý qajet ekenin aıtty.
"32 myń adam óńirden kóship ketken bolsa, 24,5 myń adam kerisinshe oblysqa kelgen. Nátıjesinde taza kóshi-qon aıyrmasy shamamen 8 myń adamdy quraıdy", - dedi Asaın Baıhanov.
Óńir basshysy jastardyń Reseıge ketýin de halyq sanynyń azaıýyna áser etip otyrǵan faktorlardyń biri retinde atady. Reseı Federasıasymen shekaralas ornalasqan Pavlodar oblysynan mektep túlekteri Novosibir, Omby, Tomsk jáne Kemerovo qalalaryna oqýǵa jıi ketedi.
"Solardyń 50–60 paıyzy oqýyn aıaqtaǵannan keıin sol jaqta qalyp, ómirin sol elde jalǵastyrady", – dedi ákim.
Asaın Baıhanov sondaı-aq óńirdiń etnıkalyq quramyna da toqtalyp ótti. Onyń aıtýynsha, qazirgi tańda Pavlodar oblysy halqynyń 57 paıyzyn qazaqtar, al 43 paıyzyn ózge ult ókilderi quraıdy.
Halyq sanynyń azaıýyn óteý maqsatynda naqty sharalar qabyldanyp jatqanyn aıtqan ákim ońtústik óńirlerden eńbek kúshi artyq aımaqtardan qonys aýdarý baǵdarlamasyna nazar aýdardy.
"Qazirgi tańda Pavlodar oblysyna 5 500 adam qonys aýdardy. Sonymen qatar 1 500-ge jýyq qandas kóship keldi. Degenmen halyq sanynyń azaıýy bar ekenin moıyndaımyz jáne bul baǵytta júıeli jumys júrgizip jatyrmyz", – dep túıindedi óńir basshysy.
