Májilis depýtaty Aigúl Quspan Qazaqstan–Ózbekstan shekarasyndaǵy jasyryn tonneldi eske salyp, shekara mańyndaǵy jer telimderin tekserip, retke keltirýdi surady. Tiisti depýtattyq saýaldy ol premer-ministr Oljas Bektenovtiń atyna joldady, dep habarlaidy Dalanews.kz.
Depýtattyń aitýynsha, shekaraǵa jaqyn aýmaqtar memleket menshigine ótýi tiis bolǵan. Alaida qazir, onyń sózinshe, jeke tulǵalar men kompaniialardyń ieligindegi 3,5 myńǵa jýyq jer telimi bar. Bul ýchaskelerde turǵyn úiler, dúkender men janarmai quiý beketteri zańsyz salynyp jatyr degen derek keltirildi.
«Bas áskeri prokýratýra bizge osyndai 312 ýchaske bar ekenin habarlady. Sonyń 87-si Túrkistan oblysynyń Saryaǵash aýdanynda ornalasqan. Ákimdikter men Jer resýrstaryn basqarý komitetine prokýrorlyq qadaǵalaý aktileri engizilgen. Alaida Úkimettegi otyrys qorytyndysymen olardyń oryndalýy toqtatylǵan», – dedi ol.
Quspannyń aitýynsha, shekara mańyndaǵy jerlerdi memleketke qaitarý – kúrdeli másele. Biraq telimderdi májbúrlep alyp qoiýdyń kesheýildeýi shekaranyń kúzet infraqurylymyn salý men jańǵyrtýǵa kedergi keltirip otyr.
«Shekara jolaǵyndaǵy jeke menshik nemese ýaqytsha paidalanýdaǵy jer telimderi memlekettik shekara qaýipsizdigine qylmystyq qol suǵýshylyqqa jaǵdai jasaidy», – dedi májilismen.
Depýtat eki mysal keltirdi:
Túrkistan oblysy Saryaǵash aýdanynyń Dostyq-2 aýylynda shekara jolaǵy turǵyndardyń aýlalarynyń irgesimen ótedi. Ótken jyldyń shildesinde qylmyskerler jalǵa alǵan úiden uzyndyǵy 310 metr bolatyn, Ózbekstan aýmaǵyna shyǵatyn jerasty tonneli tabyldy. Sol arqyly birneshe jyl boiy kontrabanda tasymaldanǵan.
Ekinshi mysal: Qordai aýdanynda shekara jolaǵyndaǵy jeke aýlanyń aýmaǵynan jerasty plastik shlangi tartylyp, sol arqyly janar-jaǵarmai Qyrǵyzstanǵa zańsyz aidalyp otyrǵan.
Aigúl Quspan shekara mańyndaǵy jer telimderin memlekettik menshikke qaitarý máselesin premer-ministrdiń jeke baqylaýyna alýdy surady. Ol úshin mynadai usynystaryn aitty:
- úkimet pen oblys ákimderine keshendi is-qimyl josparyn ázirleýdi tapsyrý;
- respýblikalyq nemese jergilikti biýdjetten rásimdi qarjylandyrý kózderin aiqyndap, biýdjettik baǵdarlamalarǵa jaýapty tulǵany bekitý.
