مەجٸلٸس دەپۋتاتى ايگٷل قۇسپان قازاقستان–ٶزبەكستان شەكاراسىنداعى جاسىرىن توننەلدٸ ەسكە سالىپ, شەكارا ماڭىنداعى جەر تەلٸمدەرٸن تەكسەرٸپ, رەتكە كەلتٸرۋدٸ سۇرادى. تيٸستٸ دەپۋتاتتىق ساۋالدى ول پرەمەر-مينيستر ولجاس بەكتەنوۆتٸڭ اتىنا جولدادى, دەپ حابارلايدى Dalanews.kz.
دەپۋتاتتىڭ ايتۋىنشا, شەكاراعا جاقىن اۋماقتار مەملەكەت مەنشٸگٸنە ٶتۋٸ تيٸس بولعان. الايدا قازٸر, ونىڭ سٶزٸنشە, جەكە تۇلعالار مەن كومپانييالاردىڭ يەلٸگٸندەگٸ 3,5 مىڭعا جۋىق جەر تەلٸمٸ بار. بۇل ۋچاسكەلەردە تۇرعىن ٷيلەر, دٷكەندەر مەن جانارماي قۇيۋ بەكەتتەرٸ زاڭسىز سالىنىپ جاتىر دەگەن دەرەك كەلتٸرٸلدٸ.
«باس ەسكەري پروكۋراتۋرا بٸزگە وسىنداي 312 ۋچاسكە بار ەكەنٸن حابارلادى. سونىڭ 87-سٸ تٷركٸستان وبلىسىنىڭ سارىاعاش اۋدانىندا ورنالاسقان. ەكٸمدٸكتەر مەن جەر رەسۋرستارىن باسقارۋ كوميتەتٸنە پروكۋرورلىق قاداعالاۋ اكتٸلەرٸ ەنگٸزٸلگەن. الايدا ٷكٸمەتتەگٸ وتىرىس قورىتىندىسىمەن ولاردىڭ ورىندالۋى توقتاتىلعان», – دەدٸ ول.
قۇسپاننىڭ ايتۋىنشا, شەكارا ماڭىنداعى جەرلەردٸ مەملەكەتكە قايتارۋ – كٷردەلٸ مەسەلە. بٸراق تەلٸمدەردٸ مەجبٷرلەپ الىپ قويۋدىڭ كەشەۋٸلدەۋٸ شەكارانىڭ كٷزەت ينفراقۇرىلىمىن سالۋ مەن جاڭعىرتۋعا كەدەرگٸ كەلتٸرٸپ وتىر.
«شەكارا جولاعىنداعى جەكە مەنشٸك نەمەسە ۋاقىتشا پايدالانۋداعى جەر تەلٸمدەرٸ مەملەكەتتٸك شەكارا قاۋٸپسٸزدٸگٸنە قىلمىستىق قول سۇعۋشىلىققا جاعداي جاسايدى», – دەدٸ مەجٸلٸسمەن.
دەپۋتات ەكٸ مىسال كەلتٸردٸ:
تٷركٸستان وبلىسى سارىاعاش اۋدانىنىڭ دوستىق-2 اۋىلىندا شەكارا جولاعى تۇرعىنداردىڭ اۋلالارىنىڭ ٸرگەسٸمەن ٶتەدٸ. ٶتكەن جىلدىڭ شٸلدەسٸندە قىلمىسكەرلەر جالعا العان ٷيدەن ۇزىندىعى 310 مەتر بولاتىن, ٶزبەكستان اۋماعىنا شىعاتىن جەراستى توننەلٸ تابىلدى. سول ارقىلى بٸرنەشە جىل بويى كونتراباندا تاسىمالدانعان.
ەكٸنشٸ مىسال: قورداي اۋدانىندا شەكارا جولاعىنداعى جەكە اۋلانىڭ اۋماعىنان جەراستى پلاستيك شلانگٸ تارتىلىپ, سول ارقىلى جانار-جاعارماي قىرعىزستانعا زاڭسىز ايدالىپ وتىرعان.
ايگٷل قۇسپان شەكارا ماڭىنداعى جەر تەلٸمدەرٸن مەملەكەتتٸك مەنشٸككە قايتارۋ مەسەلەسٸن پرەمەر-مينيستردٸڭ جەكە باقىلاۋىنا الۋدى سۇرادى. ول ٷشٸن مىناداي ۇسىنىستارىن ايتتى:
- ٷكٸمەت پەن وبلىس ەكٸمدەرٸنە كەشەندٸ ٸس-قيمىل جوسپارىن ەزٸرلەۋدٸ تاپسىرۋ;
- رەسپۋبليكالىق نەمەسە جەرگٸلٸكتٸ بيۋدجەتتەن رەسٸمدٸ قارجىلاندىرۋ كٶزدەرٸن ايقىنداپ, بيۋدجەتتٸك باعدارلامالارعا جاۋاپتى تۇلعانى بەكٸتۋ.
