Qazaqstan Prezidenti BUU ýniversitetinde dáris oqydy, dep habarlaidy Dalanews.kz.
Qasym-Jomart Toqaev Tokio qalasyndaǵy Birikken Ulttar Uiymy ýniversitetine baryp, «Dúrbeleńge toly dáýirdegi strategiialyq senimdi qalpyna keltirý: ádiletti ári turaqty álem qurý jolyndaǵy Qazaqstannyń ustanymy» taqyrybynda dáris oqydy.
"Osy aitýly oqý ornynda aimaqtaǵy elder arasynan alǵashqy dáris oqyǵan Memleket basshysy ataný – men úshin zor mártebe. Muny halyqaralyq arenadaǵy róli artyp kele jatqan Qazaqstanǵa shynaiy qurmet dep qabyldaimyn. Sondai-aq bizdiń mýltilateralizmdi ilgeriletýge ári jahandyq qaýipsizdikti qoldaýǵa baǵyttalǵan tabandy eńbegimizdi moiyndaýdyń belgisi retinde qarastyramyn. Birikken Ulttar Uiymy meniń ómirimde erekshe oryn alady. Óitkeni osy Uiymda Bas hatshynyń orynbasary jáne Jenevadaǵy ókildiktiń Bas direktory, Qarýsyzdaný jónindegi konferentsiianyń Bas hatshysy laýazymdaryn atqarý baqytyna ie boldym", – dedi Prezident.
Memleket basshysy Ýniversitet ujymyn oqý ornynyń qurylǵanyna 50 jyl tolýymen quttyqtap, BUUÝ-dyń búkil halyqaralyq qoǵamdastyqtyń igiligi úshin naqty sheshimder ázirleýge qosqan úlesin atap ótti.
Qasym-Jomart Toqaev ózi ustanatyn qaǵidattar men japon etikasy arasyndaǵy úndestikke toqtaldy. Iaǵni úilesimdilik, danalyq jáne jaýapty kóshbasshylyq – shynaiy kúsh-qýattyń qainary.
"Hanzada Siotoký VII ǵasyrda «úilesimdilik bárinen biik baǵalanýǵa tiis» dep jazdy. Búginde bul qaǵidat memlekettik basqarýda jáne halyqaralyq qatynastarda basty ról atqaryp, Qazaqstannyń syrtqy saiasatynda aiqyn kórinis taýyp otyr", – dedi Prezident.
