Shyǵys Qazaqstan oblysynda óńirlik bilim basqarmasynyń uiymdastyrýymen Jumysshy mamandyqtar jylynyń qorytyndysyna arnalǵan mazmundy forým ótti. Bul mańyzdy basqosý aimaqtyń kadrlyq áleýetin qalyptastyryp otyrǵan kolledjder men joǵary oqý oryndaryn, sondai-aq jetekshi óndiris oryndaryn bir ortaǵa toǵystyrdy, dep habarlaidy Dalanews.kz.
Forýmnyń negizgi ózegi – praktikalyq baǵyttaǵy bilim berýdi damytý jáne «kolledj – kásiporyn» arasyndaǵy ózara yqpaldastyqty nyǵaitý boldy. Oblys ákimi Nurymbet Saqtaǵanovtyń aitýynsha, búginde óńirdegi 27 kolledjde dýaldy oqytý júiesi tabysty júzege asyrylýda. Memlekettik tapsyrys aiasynda bilim alyp jatqan 5 myńnan astam stýdent 448 kásiporynnyń óndiristik alańynda tájiribeden ótip, bolashaqta turaqty jumysqa ornalasýǵa naqty múmkindik alýda.
Óńirde tórtinshi jyl qatarynan seriktes kásiporyndarǵa arnalǵan maqsatty kadr daiarlaý júiesi júieli túrde iske asyrylyp keledi. Bul bastamaǵa «Kaztsink» JShS, «Sogra jylý elektr ortalyǵy» JShS, «Óskemen ónerkásiptik armatýra zaýyty» AQ, «Promtehmontaj», Maily daqyldar tájiribelik sharýashylyǵy, Birikken energiiaservistik kompaniia, Vosca, VK Development Group jáne ózge de iri uiymdar belsendi qatysýda. Qazirgi tańda jumys berýshilerdiń qarjysy esebinen 96 stýdent bilim alýda. 2025 jyly oqýyn aiaqtaǵan 43 túlek óńir kásiporyndaryna, sonyń ishinde «Kaztsink», «Óskemen Vodokanal» jáne Baqyrshyq taý-ken kásipornyna jumysqa ornalasty.
Forým barysynda iri biznestiń kolledjderge qamqorlyq kórsetý institýtyn damytý máselesine erekshe mán berildi. Sońǵy bir jyl ishinde tálimger kásiporyndar sany alty eseden astam artyp, 32-den 203-ke jetti. Belsendi seriktester qatarynda «Kaztsink», Kaz Minerals Aktogay, Sogra jylý elektr ortalyǵy, Óskemen kondensator zaýyty, Úlbi metallýrgiialyq zaýyty syndy alpaýyt kásiporyndar bar.
Is-shara aiasynda bilikti maman daiarlaý isinde joǵary nátijege qol jetkizgen kásiporyndar men bilim berý uiymdaryn saltanatty túrde marapattaý rásimi ótti. «Jyldyń úzdik metsenaty» nominatsiiasy boiynsha marapat «Kaztsink» JShS-ne tabystaldy. Kompaniia óńirdegi kásiptik bilim berýdi damytýǵa qosqan eleýli úlesi, kolledjderdiń materialdyq-tehnikalyq bazasyn nyǵaitýy, WorldSkills chempionattaryn qoldaýy, Kolledjder aliansynyń jumysyn úilestirýi jáne stýdentterdiń praktikalyq daǵdylaryn baǵalaýdaǵy belsendiligi úshin joǵary baǵalandy.
Sondai-aq Jumysshy mamandyqtar jyly aiasynda kadr daiarlaýǵa qosqan úlesi men stýdentterdiń kásibi quzyrettiligin arttyrýǵa kórsetken qoldaýy úshin «Úzdik áleýmettik seriktes» nominatsiiasymen Shyǵys Qazaqstan oblysynyń birqatar jetekshi kásiporyndary men uiymdary marapattaldy. Olardyń qatarynda Óskemen titan-magnii kombinaty, Úlbi metallýrgiialyq zaýyty, Óskemen jáne Sogra jylý elektr ortalyqtary, Birikken energiiaservistik kompaniia, Óskemen ónerkásiptik armatýra zaýyty, Óskemen sý elektr stantsiiasy, Óskemen kondensator zaýyty, «Promtehmontaj» JShS, VK Development Group, «VetLab» veterinariialyq klinikalyq-diagnostikalyq ortalyǵy, Qurt & Wine qazaq ashanasy meiramhanasy, «Poliana» kafesi, «SMÝ-Shyǵys» qurylys kompaniiasy, Shyǵys Qazaqstan oblystyq filarmoniiasy, Katonqaraǵai memlekettik ulttyq tabiǵi parki bar.
Forým uiymdastyrýshylary seriktesterge ózara senimge negizdelgen yntymaqtastyq, jas mamandardy qoldaý jáne jumysshy mamandyqtarynyń bedelin arttyrýǵa qosqan úlesteri úshin rizashylyq bildirdi. Bul ózara áriptestik óńirdiń turaqty kadrlyq negizin qalyptastyrýǵa naqty serpin berip otyr.
Sonymen qatar óńir basshysy WorldSkills–2025 jáne erekshe bilim berý qajettilikteri bar stýdentter arasyndaǵy Abilympics–2025 respýblikalyq kásibi sheberlik chempionattarynyń jeńimpazdary men júldegerlerin marapattap, olarǵa estelik syilyqtar men alǵys hattar tabystady.
— Bul forým Jumysshy mamandyqtar jylynyń qorytyndysyn túiindep qana qoimai, kásiptik bilim berýdi odan ári damytýǵa jol ashatyn mańyzdy bastamaǵa ainaldy. Búginde biznes pen bilim berý júiesi bir maqsat jolynda birtutas komanda retinde jumys istep keledi, — dedi oblys ákimi Nurymbet Saqtaǵanov.
