«Qazaqmys» korporatsiiasy óndiristik kásiporyndardaǵy áleýmettik-turmystyq infraqurylymdy jańǵyrtýǵa baǵyttalǵan aýqymdy baǵdarlamany iske qosty, dep habarlaidy dalanews.kz.
Kompaniia ákimshilik-turmystyq korpýstardy, meditsinalyq pýnktterdi, jataqhanalardy, ashanalardy jáne basqa da nysandardy jóndeýge 2,44 mlrd teńge bóldi.
Jańǵyrtý baǵdarlamasy Jezqazǵan, Balqash, Qaraǵandy jáne Shatyrkól óndiristik keshenderin qamtidy. Jalpy alǵanda, qyzmetkerler kúndelikti paidalanatyn 80-nen astam áleýmettik-turmystyq nysan kúrdeli jáne aǵymdaǵy jóndeýden ótedi.
Kompaniia málimetinshe, qazirgi ýaqytta barlyq óndiristik alańdarda daiyndyq jumystary aiaqtalýǵa jaqyn. Onyń aiasynda merdiger uiymdar anyqtalyp, qurylys materialdary jetkizilip, nysandar jóndeý jumystaryna ázirlenip jatyr.
Q.I. Satbayev atyndagy Jezqazgan Tau-ken óndirisi kesheninde 38 nysandy jańartý josparlanǵan. Qazirdiń ózinde Jezqazǵan baiytý fabrikasynyń meditsinalyq pýnktinde jáne MEJB ákimshilik-turmystyq korpýsynda jóndeý jumystary bastaldy.
Balkhash Tau-ken óndirisi óndiristik kesheninde jóndeý MJMB ákimshilik-turmystyq korpýsynda jáne Saiaq kenishiniń ashanasynda júrgiziledi.
Nurqazgan Tau-ken óndirisi alańynda Nurqazǵan kenishiniń ákimshilik-turmystyq korpýsy jańartylyp jatyr.
Al Qaragayly Tau-ken óndirisi kesheninde Abyz jáne Qajyqonǵan kenishteri men Qaraǵaily baiytý fabrikasynda jóndeý jumystaryn bastaýǵa daiyndyq júrgizilýde. Shatyrkol-Jaysan Tau-ken óndirisi óndiristik alańynda da mamandar men qajetti tehnika jumyldyrylyp jatyr.
Kompaniianyń málimetinshe, barlyq jumystar bekitilgen kestege sáikes kezeń-kezeńimen júzege asyrylady.
«Qazaqmys» áleýmettik-turmystyq infraqurylymdy damytý óndiristik qaýipsizdikti kúsheitýdiń, qyzmetkerlerdiń densaýlyǵyn saqtaýdyń jáne jumysshy mamandyqtarynyń tartymdylyǵyn arttyrýdyń mańyzdy baǵyty ekenin atap ótti. Kompaniia osy maqsatta eńbek jaǵdaiyn jaqsartýǵa turaqty túrde investitsiia salyp keledi.
