Prokýratýra sharalarynyń nátijesinde memleketke quny 101 mln teńge bolatyn múlik qaitaryldy, dep habarlaidy Dalanews.kz.
Pavlodar oblysy Aqtoǵai aýdany prokýratýrasy memleket múddelerin qorǵaý jáne jer resýrstaryn zańdy ári tiimdi paidalaný boiynsha júrgizilgen jumys aiasynda jer zańnamasynyń talaptarynyń buzylýyn anyqtady.
Atap aitqanda, taldaý barysynda «Janabet» sharýa qojalyǵyna tiesili aýyl sharýashylyǵy maqsatyndaǵy jerlerdiń uzaq ýaqyt boiy paidalanylmaǵany anyqtaldy.
Aýdan prokýratýrasynyń usynysy boiynsha Jer resýrstaryn basqarý departamenti paidalanylmaǵan ýchaskelerdi májbúrlep alý týraly talap-aryzdy oblystyq mamandandyrylǵan aýdanaralyq ekonomikalyq sotqa joldady
Sharýashylyq ainalymyna engizilmegen jerlerdiń jalpy aýmaǵy eki júz gektardan asty.
Jalǵa alý sharttary buzylyp, ýchaskeler memlekettik menshikke qaitaryldy.
Ákimdik qaýlysymen baǵalaý quny 100 mln teńgeden asatyn jer ýchaskeleri memleket menshigine resimdeldi.
