Sot otyrysynda Aizat Jumanovanyń aiaýsyz soqqydan keiin aýrýhanaǵa jetkizilgen sáti túsirilgen videojazba kórsetildi,dep habarlaidy Dalanews.kz.
Kadrlarda áiel adamnyń es-tússiz kúide múgedekter arbasymen meditsinalyq mekemege ákelingeni kórinedi. Videoda onyń kúieýi men enesi de júrgeni kórsetiledi.
Tergeý dereginshe, oqiǵa 22 maýsymǵa qaraǵan túni bolǵan. Aizattyń kúieýi Aibar Janbolat áielin úiiniń mańynda qatygezdikpen soqqyǵa jyqqan degen kúdik bar.
Oqiǵadan keiin er adam áielin Taldyqorǵan qalasyndaǵy oblystyq aýrýhanaǵa jetkizgen. Alaida Aizat Jumanova jansaqtaý bóliminde kóz jumǵan.
Is boiynsha sot protsesi jalǵasyp jatyr.
Buǵan deiin marqumnyń týystary Aizatty arqanmen bailap, dalada súiretken bolýy múmkin degen boljam aityp, sondai-aq onyń júkti bolǵanyn joqqa shyǵarmaǵan. Alaida prokýrordyń málimdeýinshe, keshendi sot-meditsinalyq saraptama nátijesinde áiel denesinde atpen, kólikpen nemese adam kúshimen súiretýge tán izder tabylmaǵan.
Sonymen qatar, komissiia usynylǵan meditsinalyq qujattar men qaita jasalǵan gistologiialyq zertteý qorytyndylary boiynsha júktilik belgilerin anyqtamaǵan.
