Astanada jáne Qazaqstannyń ózge óńirlerinde Telegram arqyly esirtki satqan uiymdasqan qylmystyq toptyń bes múshesi 16-17 jylǵa bas bostandyǵynan aiyryldy, dep habarlaidy dalanews.kz.
Kólik politsiiasy departamenti men Bas kólik prokýratýrasy birlesip, Telegram messendjerindegi «Pitbullshop» internet-dúkeni arqyly esirtki taratqan uiymdasqan qylmystyq toptyń áreketin toqtatty.
Jedel is-sharalar barysynda jasy 25 pen 40 aralyǵyndaǵy bes adam ustaldy. Tergeý málimetinshe, top músheleriniń árqaisysy belgili bir mindet atqarǵan. 35 jastaǵy uiymdastyrýshy esirtki jetkizý men qarjy ainalymyn baqylasa, 26 jastaǵy qatysýshy internet-dúkenniń jumysyn júrgizip, ony ilgeriletýmen ainalysqan.
Al 25 jáne 40 jastaǵy eki er adam esirtkini bólip ólshep, orap, jasyryn oryndarǵa jetkizgen. Taǵy bir qatysýshy esirtkini bólshek saýdamen ótkizip, jańa kýrerlerdi tartqan.
Quqyq qorǵaý organdarynyń málimetinshe, toptyń qyzmeti kezinde shamamen 2 myń jasyryn esirtki qoimasy uiymdastyrylǵan. Zańsyz saýdadan túsken jalpy qarajat 90 million teńgeden asqan.
Ótken jyldyń jazynda kúdiktiler ustalǵan kezde politsiia qyzmetkerleri 165 gramnan astam marihýana men kannabis shaiyryn tárkilegen. Budan bólek, esirtkini oraýǵa arnalǵan materialdar, elektrondy tarazylar, bank kartalary, aqsha jáne qylmystyq áreketke paidalanylǵan ózge de zattar alynǵan.
Sot bes aiyptalýshynyń barlyǵyn kináli dep tanydy. Topty uiymdastyrǵan adam 17 jylǵa, qalǵan tórt qatysýshynyń árqaisysy 16 jylǵa bas bostandyǵynan aiyryldy.
