Densaýlyq saqtaý ministri Aqmaral Álnazarova Áleýmettik meditsinalyq saqtandyrý qorynyń (ÁMSQ) tóraǵasy Aidyn Qulseiitovtiń qyzmetten ketýine qatysty túsinikteme berdi, dep habarlaidy Dalanews.kz.
Ministrdiń aitýynsha, Qulseiitovtiń otstavkasy ministrlikpen kelisilmegen sheshimderge bailanysty bolǵan.
“Bul sheshim ÁMSQ direktorlar keńesiniń tarapynan qabyldanǵan. Biraq bir ǵana aktsioner – Densaýlyq saqtaý ministrligimen kelispegen edi”, – dedi Álnazarova.
Ministr atap ótkendei, másele negizinen qyzmetkerlerdiń jáne direktorlar keńesiniń músheleriniń ailyǵyn arttyrý, korporativtik hatshynyń jalaqysyn kóterý jáne syiaqy engizý siiaqty sheshimderge qatysty bolǵan. Degenmen bul áreket jalaqy qorynyń kúrt ósýine ákep soqqan, sondyqtan ministrlik birtutas sheshim qabyldaýǵa tyrysqanymen, kelisimge kele almaǵan. Nátijesinde, birtutas aktsionerdiń sheshimimen direktorlar keńesiniń sheshimi joiylǵan.
“Bul jaǵdai qarapaiym bolyp kóringenimen, júiede aitarlyqtai qiyndyq týǵyzdy. Qoǵamnyń ÁMSQ júiesine qatysty suraqtary bar ekenin bilemiz, olardy tolyq eskeremiz. Byltyr jáne biyl mindetti áleýmettik meditsinalyq saqtandyrý zańyn jetildirý jumystary júrgizildi. Biz depýtattar men halyqtyń usynystaryn nazarǵa ala otyryp, meditsinalyq kómekti qoljetimdi ári sapaly etýge, meditsinalyq qyzmetkerlerdi yntalandyrýǵa kúsh salamyz”, – dedi Álnazarova.
Ministrdiń aitýynsha, ÁMSQ júiesi – kúrdeli ári sezimtal qurylym, onda 300 myńnan astam meditsinalyq qyzmetker jáne 20 millionǵa jýyq tutynýshy qamtylǵan. 3 millionnan astam adam dispanserlik esepte, sondai-aq ambýlatorlyq dári-dármekpen qamtamasyz etiletinder sany da kóp. Sondyqtan júieni jetildirý barysynda emhanalyq qyzmet kórsetý sapasy, dári-dármekpen qamtamasyz etý jáne meditsinalyq kadrlardy yntalandyrý máseleleri basty nazarda bolady dep eskertti ministrlik.
