AQSh-tyń Ishki qaýipsizdik ministrligi grin-karta utys oiyny baǵdarlamasyn (Diversity Visa Lottery) ýaqytsha toqtatatynyn málimdedi, dep habarlaidy Dalanews.kz.
Bul týraly X áleýmettik jelisinde Ishki qaýipsizdik ministri Kristi Noem habarlady. Onyń aitýynsha, sheshim prezident Donald Tramptyń tapsyrmasymen qabyldanǵan. Buǵan Braýn ýniversiteti men Massachýsets tehnologiialyq institýtynda (MIT) bolǵan atysqa kúdikti adamnyń 2017 jyly AQSh-qa dál osy baǵdarlama arqyly kelgeni belgili bolǵany sebep bolǵan.
«Bul qorqynyshty adam bizdiń elge eshqashan kirmeýi kerek edi. Prezident Tramptyń nusqaýy boiynsha men AQSh-tyń Azamattyq jáne immigratsiia qyzmetine (USCIS) DV1 baǵdarlamasyn dereý toqtatýdy tapsyramyn. Bul apatty baǵdarlamanyń saldarynan budan bylai amerikalyqtar zardap shekpeýi tiis», – delingen habarlamada.
Resmi derekterge sáikes, Rod-Ailend shtatyndaǵy Providens qalasynda Braýn ýniversitetiniń injenerlik-fizikalyq korpýsynda bolǵan atys saldarynan eki adam qaza taýyp, taǵy toǵyz adam aýyr jaraqat alǵan. Qaza tapqandardyń arasynda Ózbekstannan kelgen stýdent bar.
Qazaqstannyń Syrtqy ister ministrliginiń resmi ókilderi zardap shekkender arasynda Qazaqstan azamattary joq ekenin habarlady.
Aita keteiik, Gun Violence Archive derekterine sáikes, 2025 jyldyń basynan beri AQSh-ta 389 jappai atys oqiǵasy tirkelgen. Al ótken jyly mundai jaǵdailar sany 500-den asqan.
