Pavlodar soty Eńbek mobıldigi ortalyǵynyń dırektory Merýert Esembaevany kináli dep tanydy. Ol 2026 jylǵy 22 aqpanǵa qaraǵan túni qyzmettik Chery Tiggo 7 Pro kóligimen júrip kele jatyp, polısıanyń toqtaý týraly talabyna baǵynbaǵan, dep habarlaıdy Dalanews.kz Nege.kz-ke silteme jasap.
Polısıa qyzmetkerleri ony qýyp jetip toqtatqan. Alaıda áıel alkogóldik mas kúıin tekserý prosedýrasynan ótpegen.
Merýert Esembaeva – Týrızm jáne sport mınıstrligi Sport jáne dene shynyqtyrý isteri komıteti tóraǵasynyń orynbasary Nurlan Esembaevtyń jubaıy.
Tekserý barysynda onyń memlekettik mekemede jumys isteıtini jáne resmı túrde dekrettik demalysta bolǵany anyqtalǵan. Soǵan qaramastan ol qyzmettik kólikti jeke maqsatta paıdalanǵan.
Sotta Esembaeva men onyń qorǵaýshylary aıypty joqqa shyǵarýǵa tyrysqan. Olardyń aıtýynsha, áıeldiń densaýlyǵy nasharlap, alkotesterge úrleı almaǵan.
Alaıda polıseılerdiń beınejetondarynan jáne medısınalyq tekserý ortalyǵyndaǵy kameralardan alynǵan jazbalar bul ýájdi rastamaǵan. Beınejazbalarda aıyptalýshy dárigerdiń qolyn ıterip, dóreki sóılep, narkologqa «ózińiz úrlep kórińiz» dep usynys jasaǵany kórinedi.
Sonymen qatar, ol birneshe ret túsiniktemesin ózgertken: áýeli oń jaq búıiri aýyratynyn aıtsa, keıin sol jaǵy aýyrǵanyn aıtyp, kýágerlerdi shaqyrýdy talap etken. Sondaı-aq úıinde balalar kútip otyrǵanyn alǵa tartqan.
Polısıa qyzmetkerleriniń aıtýynsha, kóliktiń ishinde tártipsizdik bolǵan, ashyq syra bankisi men chechıl irimshigi tabylǵan.
Keıin Esembaeva jedel járdem shaqyryp, dárigerdiń kabınetinen tikeleı aýrýhanaǵa ketip qalǵan. Osylaısha ol medısınalyq tekserýden ótpegen.
Alaıda sot beınejazbalardy zertteı kele, aıyptalýshy tekserýden jaltarý úshin ózin jaısyz sezingendeı keıip tanytqan degen qorytyndyǵa kelgen.
Sot Merýert Esembaevany ákimshilik quqyqbuzýshylyq jasaǵany úshin kináli dep tanyp, ony 8 jylǵa kólik júrgizý quqyǵynan aıyrdy. Onyń tórt kámeletke tolmaǵan balasy bar ekenin eskerip, qamaýǵa alý jazasy qoldanylmaǵan.
Sonymen qatar sýdıa A. S. Adamjanova Pavlodar oblysynyń ákimine jeke qaýly shyǵardy. Óńir basshylyǵyna bir aı ishinde dekrettik demalystaǵy qyzmetkerdiń qolyna memlekettik mekemeniń kóligi qalaı berilgenin anyqtap, jaýaptylardy jaýapqa tartý tapsyryldy.
