Búgin Qyzylorda qalasyndaǵy «Óner ortalyǵynda» Qazaqstannyń eńbek sińirgen qairatkeri, Qazaq ulttyq konservatoriiasynyń qurmetti professory, jyraý Almasbek Almatovtyń 70 jas mereitoiyna arnalǵan «Jyr kerýen» atty shyǵarmashylyq kesh ótti, dep habarlaidy Dala News.
Oǵan oblys ákimi Nurlybek Nálibaev, jazýshy, tarihshy-etnograf, Qazaqstannyń eńbek sińirgen qairatkeri Qoishyǵara Salǵarauly, Halyq jazýshysy, Qazaqstannyń eńbek sińirgen qairatkeri, Aitys aqyndary men jyrshy-termeshilerdiń halyqaralyq odaǵynyń tóraǵasy Júrsin Erman, aqyn, Parlament Májilisiniń depýtaty Janarbek Áshimjan, Almasbek Nurmahanulynyń úzeńgiles áriptesteri men elimizge belgili shákirtteri, jaýapty sala basshylary, ziialy qaýym ókilderi qatysty.
Aimaq basshysy mereitoi iesiniń tól ónerdi órkendetýge qosqan úlesin atap ótip, barsha Syr jurtshylyǵynyń atynan syi-qurmet kórsetip, avtokólik kiltin tartý etti.
Sondai-aq keshte Janarbek Áshimjan óner qairatkerine Májilis tóraǵasy Erlan Qoshanovtyń quttyqtaýyn tabystady.
«Syr óńiri – talai marǵasqa jyraýlar men týma talanttardy ómirge ákelgen, jyraýlyq ónerdiń túp qazyǵy, altyn kómbesi, alyp taiqazany sanalatyn qutty meken. Memleket basshymyz Qasym-Jomart Kemeluly Qyzylordada ótken Ulttyq quryltaidyń besinshi qorytyndy otyrysynda «Jalpy, «Syr eli – jyr eli» dep beker aitylmaidy. Qorqyt ata zamanynan jalǵasyp kele jatqan jyraýlyq-jyrshylyq jáne kúishilik óner bul aimaqta keń qanat jaiǵan. Jienbai, Nurtýǵan, Nartai syndy sańlaqtar negizin qalaǵan jyrshylyq mektepterdi búkil elimiz biledi», – dep erekshe atap ótken bolatyn.
Syr boiyndaǵy jyraýlyq ónerdiń kórnekti ókili, Syr súleileriniń izin jalǵaýshy, Qazaqstannyń eńbek sińirgen qairatkeri, zertteýshi-ǵalym, «Parasat», úshinshi dárejeli «Barys» ordenderiniń iegeri, Qyzylorda oblysynyń qurmetti azamaty Almasbek Nurmahanuly Almatov mereili 70 jasqa toldy.
Almasbek Nurmahanuly – dáýir kóshinde dara iz qaldyrǵan jyr alyptarynyń murageri, Syr óńirine ǵana tán jyraýlyq dástúrdiń sabaqtastyǵyna airyqsha eńbek sińirgen óner qairatkeri. Aǵamyz jastaiynan qolyna dombyra alyp «Alpamys batyr», «Qobylandy batyr», «Qyz Jibek» siiaqty elge keń taraǵan dastandardy jyrlap, «jas jyrshy» atandy.
«Syr sulýy» ansambli quramynan bastalǵan shyǵarmashylyq joly belgili jyraý, ulaǵatty ustaz, óner zertteýshisi, ǵalym, qoǵam qairatkeri retinde biik belesterge shyǵardy.
Egemendik alǵan jyldar ishinde ulttyq ónerdiń bul túrine erekshe kózqaras qalyptasyp, ata-babalarymyzdyń asyl qazynasy jarqyrai tústi. Aldaǵy ýaqytta da ulttyq ónerimizdiń shamshyraǵy bolyp, keler urpaqqa rýhani mura syilai berińiz»,– dedi N.Nálibaev.
Óner keshinde aitysker aqyn Muhtar Niiazov mereitoi iesine arnaý aityp, Qazaqstannyń eńbek sińirgen qairatkerleri Elmura Jańabergenova, Aigúl Elshibaeva jáne basqa da aqyn-jyrshylar óner kórsetti. Jyraýdyń ózi «Jyr bastaýyn» oryndady.
Almasbek Almatov Syr boiynda maqam-saz erekshelikterine qarai jyraýlyq mektepterdiń qalyptasýyna, atadan balaǵa miras bolǵan tól ónerimizdi jańa dáýirge jetkizýge eren eńbek sińirdi. Jyraýlyq óner akademiialyq bilim berý júiesine engizilip, «Dástúrli óner – jyr» mamandyǵy ashyldy. Qurmanǵazy atyndaǵy Qazaq ulttyq konservatoriiasyndaǵy, Qazaq ulttyq óner ýniversitetindegi, Qorqyt ata atyndaǵy Qyzylorda ýniversitetindegi kafedralarda jyrshy-jyraýlar kásibi turǵyda qalyptasty. Dástúrli jyr oryndaýshylardy maman etip daiarlaý arqyly ótkenniń ózegin búgin men erteńge jalǵap, júzdegen shákirt tárbielep, óner alamanyna qosty. AQSh, Frantsiia, Italiia, Shveitsariia, Ulybritaniia, Egipet, Mońǵoliia jáne basqa da shet memleketterde ulttyq muramyzdy ulyqtap, el mereiin asqaqtatty. Búginde mereitoi iesi tárbielegen shákirtter halyqaralyq, respýblikalyq baiqaýlardyń jeńimpazy atanyp, elimizdiń ár óńirinde jyraýlyq dástúrdiń altyn arqaýyn jalǵastyryp keledi.
Aita ketý kerek, Almasbek Almatovtyń 70 jas mereitoiy aiasynda Qorqyt ata atyndaǵy ýniversitettiń Stýdentter saraiynda V tomdyq tańdamaly shyǵarmalarynyń tusaýkeser rásimi, Qarmaqshy aýdanynda «Asyl jyrdyń Almasy» atty respýblikalyq jyrshy-jyraýlar festivali ótýde.
