Bul týraly Eýrazıa birinshi arnasy habarlaıdy.
Jalpy jaǵdaı túsinikti bolsyn, aıtaıyn. Quqyq qorǵaýshy Baqytjan Tóreǵojına karantın kezinde halyq qalaýlylary nendeı sharýa tyndyryp jatqanyn bilmek bolyp kóbine habarlasypty. Biri jaýap qatqan, ekinshileri telefonyn kótermegen. Vladımır Bojko bolsa, feısbýk arqyly bylaı depti.
"Siz qurmettim, bir nárseni shatastyryp otyrǵan sıaqtysyz. Maǵan daýys bergen joqsyz, sáıkesinshe saılaýshym emessiz. Jumys berýshim de siz emes".
Aıgúl Ótepova "sengen qoıym sen bolsań" degenniń kerisi ekenin aıtady. Assambleıa atynan májiliske ótip, tóraǵanyń orynbasary bolǵan Bojko ózine qatysty eshqandaı sharanyń qoldanylmaıtynynyn bilgen soń, osylaı qyr kórsetti, deıdi.
Aıgúl Ótepova, qoǵam belsendisi:
"Sizdiń aılyǵyńyz halyqtyń salyǵynan quralady. Salyq halyqtyń aqshasynan quralady. Sondyqtan suraýǵa meniń qaqym bar dedim. Memlekettik qyzmetkerdiń etıkasy bar. Ol dokýment retinde shyqqan. Bojko ony oqymaǵan shyǵar, mensinbeıtin shyǵar".
Ashyǵyn aıtaıyq. Kúnuzaq depýtattyń ózine de, kómekshisine de qońyraý shaldyq. Telefondary sónip tur. Vladımır Bojkonyń qoǵammen dıalog qurý stıli kópke belgili. Osyǵan deıin áleýmettik tólem úshin tizerlep turyp alǵys aıtyńdar degeni áli kúnge el esinde.
Májilistiń vıse-spıkeri osylaı qyr kórsetse de, ózge depýtattar qaınaǵan tirliktiń bel ortasynda júrmiz, deıdi. Tómengi palatadaǵy 107 depýtattyń birerimen tildestik. Mysaly, Magerram Magerramov komýnıs áriptesterimen birige otyryp karantın kezeńinde respýblıka boıynsha 8000 myńǵa jýyq az qamtylǵan otbasyǵa azyq-túlik taratypty.
Magerram Magerramov, QR Parlamenti Májilisiniń depýtaty:
"Birneshe kún buryn ǵana taǵy bir márte birige otyryp qarajat aýdardyq. Muqtaj otbasylarǵa qoldan kelgenshe qolǵabys tıgizip jatyrmyz. Kóptegen ótinishter túsedi. Biri jerleý rásimimen másele bar deıdi. Taǵy biri páteraqysyn tóleı almaı jatyr. Barlyǵyna kómekteýge tyrysamyz. Jaqynda qarttar úıi, balalar úıi sıaqty nysandardy aralap, ol jerge de kerek jabdyqtar jetkizdik".
Nurjan Áltaevpen de baılanysqa shyqtyq. Májilis depýtaty dárihanalardy aralap, baǵalaryn salystyryp, halyqpen tildesken. Parlament ókiliniń aıtýynsha 99 paıyz dárihanalarda vırýsqa qarsy preparattar joq. Emhanalardaǵy jaǵdaı da máz emes eken.
Nurjan Áltaev, QR Parlamenti Májilisiniń depýtaty:
"Týysqandaryna aıtady eken dárilerdi ózderiń satyp alyńdar dep. Myna jaqta SK Farmasıa da basqasy da aıtyp jatyrbiz tolyǵymen qamtamasyz etip jatyrmyz, ol jerde tapshylyq joq dep. Tapshylyq bolmasa nege azamattar nege qaltasynan satyp alýy kerek? Kóptegen sheneýnikter aıtatyn med.strahovka tóleńder, tóleseńder erteń senderdi tegin emdeıdi dárilerdi tegin beredi dep. Al endi halyq, kásipkerler sony tóledi. Al aqsha qaıda?".
Quramynda 49 depýtaty bar Senattyń da ókilderiniń nendeı sharýa tyndyryp jatqanyn baǵamdadyq. Joǵary palatanyń tóraǵasy Máýlen Áshimbaev senatorlardyń bári elde ekenin jekizdi.
Al, Dana Nurjigit sıaqty belsendi azamattar el arasynda júrip, ótkir máselelerdi kóterip júr.
Dana Nurjigit, QR Parlamenti Senatynyń depýtaty:
"Jemqorlardy sonshalyqty jek kóretinimiz ashyq aıtylsa. Qol bermeıtindeı, aralaspaıtyndaı, súıekke tańba bolatyndaı. Sen sol kezde okopta jatyp oq atqansyń! Jaý kele jatyr degende saýdalasyp turǵansyń! Alypsatarlardyń aty belgili bolsa. Mynadaı kishkentaı apparatty beıbit kúnde 10 myń teńgege satyp, soǵys bolyp jatqanda 30-40 myńǵa saýdalap. Óleıin dep jatqan adamnyń kıslorodyn ólsheýge bermeı otyrǵandardyń esimi belgili bolýy kerek".
Saıasattanýshy Qazbek Maıgeldınov dál qazirgi kezeńde barlyq deńgeıdegi memlekettik qyzmetkerler ózderiniń qoldarynan is keletinin dáleldeýi kerek ekenin aıtady. Halyqpen dıalog qurý mańyzdy bolyp tur.
Qazbek Maıgeldınov, saıasattanýshy:
"Sheneýnik bolsyn, depýtat bolsyn, memlekettik qyzmetker bolsyn olar halyq úshin jumys istep júr. Halyqtyń muń muqtajyn sheship júrgen adamdar. Qazirgi tańda pandemıanyń órshýine baılanysty, ekonomıkalyq daǵdarystyń órshýine baılanysty halyqtyń bılikke degen suranysy, halyqtyń bılikten kútetin úmitteri artyp otyr. Bul jerde el prezıdenti aıtqandaı estýshi memleket. Bılik pen halyq arasyndaǵy dıalogty jandandyrý kerek".
Jalpy alǵanda Parlament músheleri qoǵamdaǵy ózekti máselelerdi kóterip jatqanyn jetkizdi. Estýshi memleket degenniń bir kórinisi osy bolar. Tek Bojko syndy myrzalar halyqpen sóıleskende óziniń depýtat ekenin, umytpasa eken.
Taǵy oqyńyz:
https://dalanews.kz/46390
