28 shildede sot eks-premerdi qyzmetin asyra paidalandy, kóleńkeli aqshany zańdastyrdy degen baptar boiynsha aiypty dep tanydy. Oǵan sonymen birge 49,3 mln dollar aiyppul tóleýdi mindettedi. Sot Nadjib Razakty sot úkimi kúshine engenshe, bostandyqqa jiberdi.
Nadjib Razak 2009 jyly úkimet basshysy bolyp turǵanda ózi qurǵan 1MDB investitsiialyq qordan aqsha jymqyrǵanyn moiyndamady. Sot materialynda aitylǵan qarjy memlekettik qor janynan qurylǵan SRC International kompaniiasyna tiesili 10 mln dollarǵa qatysty.
AQSh tergeýshileri memlekettik qordan keminde 4,5 mlrd dollar urlanyp, kúrdeli jeliler arqyly zańdastyrylǵan dep otyr. Bul qarjy qymbat záýlim úiler, baǵaly zattar satyp alýǵa jumsalǵany aitylady.
Nadjib Razak banktegi jeke esep shotyndaǵy 700 mln dollardy Saýd Arabiiasynyń syilyǵy dep málimdep, bul aqshany qaitardym dedi.
Eks-premer 2018 jyly qamaýǵa alynǵanǵa deiin Reuters agenttigine suqbat berip, úiin tintý kezinde tabylǵan 300 qorap baǵaly zattar men qymbat áshekeilerin qyzy men áieline jiberilgen syilyq ekenin aitqan.
Nadjib Razak kúieý balasy Daniiar Nazarbaev árbiri keminde on myń dollar turatyn sómkelerdi qyzy men áieline syilady degen. Nadjib Razaktyń qyzy Nýriana Nadjva Daniiar Kesikbaevqa (BAQ onyń familiiasy Daniiar Nazarbaev bolǵanyn jazady) turmysqa shyqqan.
Ol - Qazaqstannyń eks-prezidenti Nursultan Nazarbaevtyń inisi Bolat Nazarbaevtyń burynǵy áieli Maira Qurmanǵalievanyń uly.
Nadjibtiń áieli men onymen birge jumys istegen joǵary laýazymdy sheneýnikterge de memleket qarjysyn urlady degen aiyppen qylmystyq is qozǵalǵan.
Ótken aptada AQSh-tyń Goldman Sachs investitsiialyq banki Malaiziia úkimetimen 1MDB qoryna qatysty óziniń qyzmetkerleriniń aiyptalýyna bailanysty 3,9 mlrd dollar tóleý jóninde kelisimge keldi. 1MDB qoryna qatysty janjal 2018 jyldaǵy sailaýdan keiin Nadjib úkimetiniń otstavkaǵa ketýine sebep boldy.
