28 شىلدەدە سوت ەكس-پرەمەردى قىزمەتىن اسىرا پايدالاندى، كولەڭكەلى اقشانى زاڭداستىردى دەگەن باپتار بويىنشا ايىپتى دەپ تانىدى. وعان سونىمەن بىرگە 49،3 ملن دوللار ايىپپۇل تولەۋدى مىندەتتەدى. سوت نادجيب رازاكتى سوت ۇكىمى كۇشىنە ەنگەنشە، بوستاندىققا جىبەردى.
نادجيب رازاك 2009 جىلى ۇكىمەت باسشىسى بولىپ تۇرعاندا ءوزى قۇرعان 1MDB ينۆەستيسيالىق قوردان اقشا جىمقىرعانىن مويىندامادى. سوت ماتەريالىندا ايتىلعان قارجى مەملەكەتتىك قور جانىنان قۇرىلعان SRC International كومپانياسىنا تيەسىلى 10 ملن دوللارعا قاتىستى.
اقش تەرگەۋشىلەرى مەملەكەتتىك قوردان كەمىندە 4،5 ملرد دوللار ۇرلانىپ، كۇردەلى جەلىلەر ارقىلى زاڭداستىرىلعان دەپ وتىر. بۇل قارجى قىمبات ءزاۋلىم ۇيلەر، باعالى زاتتار ساتىپ الۋعا جۇمسالعانى ايتىلادى.
نادجيب رازاك بانكتەگى جەكە ەسەپ شوتىنداعى 700 ملن دوللاردى ساۋد ارابياسىنىڭ سىيلىعى دەپ مالىمدەپ، بۇل اقشانى قايتاردىم دەدى.
ەكس-پرەمەر 2018 جىلى قاماۋعا الىنعانعا دەيىن Reuters اگەنتتىگىنە سۇقبات بەرىپ، ءۇيىن ءتىنتۋ كەزىندە تابىلعان 300 قوراپ باعالى زاتتار مەن قىمبات اشەكەيلەرىن قىزى مەن ايەلىنە جىبەرىلگەن سىيلىق ەكەنىن ايتقان.
نادجيب رازاك كۇيەۋ بالاسى دانيار نازاربايەۆ ءاربىرى كەمىندە ون مىڭ دوللار تۇراتىن سومكەلەردى قىزى مەن ايەلىنە سىيلادى دەگەن. نادجيب رازاكتىڭ قىزى نۋريانا نادجۆا دانيار كەسيكبايەۆقا (ب ا ق ونىڭ فاميلياسى دانيار نازاربايەۆ بولعانىن جازادى) تۇرمىسقا شىققان.
ول - قازاقستاننىڭ ەكس-پرەزيدەنتى نۇرسۇلتان نازاربايەۆتىڭ ءىنىسى بولات نازاربايەۆتىڭ بۇرىنعى ايەلى مايرا قۇرمانعالييەۆانىڭ ۇلى.
ءنادجيبتىڭ ايەلى مەن ونىمەن بىرگە جۇمىس ىستەگەن جوعارى لاۋازىمدى شەنەۋنىكتەرگە دە مەملەكەت قارجىسىن ۇرلادى دەگەن ايىپپەن قىلمىستىق ءىس قوزعالعان.
وتكەن اپتادا اقش-تىڭ Goldman Sachs ينۆەستيسيالىق بانكى مالايزيا ۇكىمەتىمەن 1MDB قورىنا قاتىستى ءوزىنىڭ قىزمەتكەرلەرىنىڭ ايىپتالۋىنا بايلانىستى 3،9 ملرد دوللار تولەۋ جونىندە كەلىسىمگە كەلدى. 1MDB قورىنا قاتىستى جانجال 2018 جىلداعى سايلاۋدان كەيىن نادجيب ۇكىمەتىنىڭ وتستاۆكاعا كەتۋىنە سەبەپ بولدى.
