Azamattyq qorǵaý qyzmetiniń qyzmetkerlerinen apattarǵa qarsy turý úshin árqashanda ázirlik talap etiledi. Qutqarýshylar tipti beibit kúnderi de adamdardyń ómiri men densaýlyǵy úshin kúresýde aldyńǵy qatarda. Qutqarýshy mamandyǵy eń kúrdeli kásipterdiń biri.
Yntymaǵy jarasqan erjúrek, batyl jandardyń birligi apatpen kúreste jan aiamai birge jumyla qimyldaǵan kezde kórinedi.
Basty mindeti — halyqtyń beibit ómirin, turmystaǵy, óndiristegi qaýipsizdigin qamtamasyz etip, apattyq jaǵdaiǵa jol bermeý. Tótenshe jaǵdai oryn alǵan kezde qiyn jaǵdaidan shyǵýyna óz ómirlerin arnaityn mamandyq ieleri.
Biyl qazaqstandyq qutqarý qyzmetiniń qurylǵanyna 26 jyl toldy. 1995 jyly Tuńǵysh Prezident N.Nazarbaevtyń Jarlyǵymen Qazaqstan Respýblikasynyń Tótenshe jaǵdailar jónindegi memlekettik komiteti qurylǵan bolatyn.
2008 jyly 19 qazan zańdy túrde Qazaqstan Respýblikasynyń mereke kúnderine qutqarýshylar kúni bolyp tirkeldi.
Órt sóndirýshi, azamattyq qorǵaý aǵa leitenanty Jetibai aýylynyń № 10 órt sóndirý bólimi bastyǵynyń orynbasary Qasqyrbai Nursultan Qanatuly Qazaqstan Respýblikasynyń Tótenshe jaǵdailar ministrligi qurylǵan jyly týǵan.
26 jasynda ol qundy jumys tájiribesin jinady, bilik pen ujymnyń qurmetine ie boldy. 2013 jyly Jetibai aýylynyń № 3 jalpy bilim berý orta mektebin bitirdi, 2014 jyldan 2018 jylǵa deiin Kókshetaý tehnikalyq institýtynda «Órt qaýipsizdigi» mamandyǵyn oqydy.
2018 jyly institýtty bitirgennen keiin Nursultan №10 órt sóndirý bóliminiń qaraýyl bastyǵy bolyp jumys istedi. 2019 jyldyń mamyr aiynan bastap qazirgi ýaqytqa deiin № 10 órt sóndirý bólimi bastyǵynyń orynbasary qyzmetin atqarýda.
Nursultan bólim men mekeme ótkizetin barlyq is-sharalarǵa belsendi qatysady, 2018 jyly ol órt sóndirý krossfiti boiynsha jarystarǵa qatysyp, birinshi orynǵa ie boldy. 2019 jyly voleiboldan týrnirde № 10 órt sóndirý bóliminiń komandasy ekinshi oryn, qazaqsha kúresten aýdandyq jarystarda birinshi oryn aldy.
Onyń pikirinshe ujymda jaqsy, dostyq qarym-qatynasty saqtaý óte mańyzdy, óitkeni olardyń jumysynyń sipaty bir-birine tolyq senimdi bolýdy talap etedi. Qyzmet etý merziminiń qysqalyǵyna qaramastan, Nursultan ujymda eńbekqorlyǵy, jumysqa degen jaýapty kózqarasy úshin qurmet tutady.
"Qutqarýshy mamandyǵy – eń kúrdeli kásipterdiń biri, óitkeni olar eldiń kez kelgen núktesinde jáne odan tys jerlerde eń qiyn jaǵdailarda, avariialarda, TJ-da adamdarǵa kómekke keledi. Qiraǵan úilerde, órt kezinde jáne sý tasqyny kezinde, sondai-aq jai ǵana qiyndyqqa tap bolǵandarǵa da kómekke keledi. Jumysymyz óte qiyn. Biraqta adam ómirin qutqaryp jatqan kezde, esh qiyndyqqa qaramaimyz. Keiin biz kómek qolyn sozǵan jandar alǵystaryn aityp, rizashylyqtaryn bildirip jatady», – deidi ol.
Onyń atap ótkenindei qutqarýshylardyń túrli apat saldaryn joiýǵa sińirgen eńbegi de orasan zor. Sondai-aq TJB qyzmetkerleri balalardy órt qaýipsizdiginiń erejelerimen tanystyrýǵa baǵyttalǵan, aldyn –ala túsindirý maqsatyndaǵy is – sharalardy únemi ótkizip turady.
Qyzmetkerler is – sharany tek áńgime jáne baiandama túrinde ǵana emes, suraq – jaýap, baiqaýlar retinde, sondai-aq órtti sóndirý taqyrybynda slettar da ótkizip turady. Barlyq ótkizilgen is – sharalar, qazirgi balalardyń órt qaýipsizdigi salasyndaǵy oi – óristeriniń damýyna negizdelgen.
Qutqarýshy bolǵysy kelgen adamǵa densaýlyǵy men sporttyq deńgeii mańyzdy. Aityp kelmeitin tosynnan bolǵan apat kezinde azamattarǵa birinshi bolyp, kómekke umtylatyn tótenshe jaǵdailar qyzmetiniń qutqarýshylaryna úlken júrek, bilim men bilik jáne tájiribe kerek ekeni daýsyz.
Qýanysh Rahmetollauly
