Prezident Qasym-Jomart Toqaev sý tasqynyna qarsy kúreske belsendi qatysqan azamattardy memlekettik nagradalarmen marapattady. “Aqorda" rezidentsiiasynda ótken saltanatty rásimge shaqyrylǵan qarapaiym qaharmandarmen tilshimiz suqbattasqan edi.
Tabiǵi apatpen kúreske búkil halyq atsalysty, bul iste ár adamnyń is-áreketi mańyzdy boldy. Sol kúnderge oisha oralsaq...
Áliia Siǵýatqyzy Dosmuhanova, «Zaǵiptar armany» qoǵamdyq birlestiginiń is júrgizýshisi:
Ol kezde biz marapat týraly oilaǵan joqpyz ǵoi. El basyna kún týdy, tabiǵat tosyn minez kórsetti. «Reseiden sý kele jatyr» degen habar tarady. Áleýmettik jelilerdi ashýǵa, teledidardy qosýǵa qorqyp qaldyq. Qai jerdi ashyp qarasań da, «Atyraýdy sý basady» degen daqpyrt áńgime júrdi. Halyq qatty úreilendi, jasyratyny joq, turǵyndardyń teń jartysy qaladan qashyp ketti.
Asylanbek Muqtaruly Aqylbekov, qol kúresten QR sport sheberi:
Atyraý oblysy, Mahambet aýdanynda sý keledi degendi estigen sátten, iaǵni 3 sáýirden bastap bóget salý jumystaryn bastadyq. Qolymyzǵa kúrek ustap, jastardy qapshyq qaptaýǵa shaqyryp, arnaiy tehnikalardy negizgi oryndarǵa baǵyttap, jumysty uiymdastyrdyq. Solaisha, 14 shaqyrymdyq bóget jumysyn bitirdik. Bógetti bitirgennen keiin iri kólemde sý keldi. 24 saǵat boiy kezekshilikke shyǵyp, kúni-túni baqylap otyrdyq. Qazirgi ýaqytta sý ketip, ózen óz arnasyna túsip jatyr. Bylai qaraǵanda, qaraiǵan úidi apattan aman alyp qaldyq qoi. Eriktiler osylai bas kótermegende, ol úilerdi sý basar ma edi? Halyqqa, memleketke milliardtaǵan shyǵyn keler edi. Sol eńbegimiz eskerildi dep oilaimyn.
Oljas Abzaluly Sultanov, «CHI» JShS biznesti damytý direktory:
Sol kúnderge oisha oralatyn bolsaq, jaǵdai óte qiyn boldy. Ne isterimizdi bilmedik. «Sý kele jatyr» degen aqparat jetkende qolymyzda daiyn jospar bolǵan joq. Ol jospar ákimshilik tarapynan sol kezde jasaldy. 1993-94 jyldary qai jerde qandai jaǵdailar bolǵany anyqtaldy, kartalar tekserildi, úlkendermen sóilestik. Solaisha úlken bir jospar quryldy. Al endi sol jospardyń ishinde adam kúshi óte mańyzdy boldy. Atyraýymyz eń úlken aýyzbirshilik úlgisin kórsetti. Halyq, ákimdik, basqa da memlekettik organdar bolyp tize qosyp, jospardy iske asyrdyq. Jigitter kúrek ustap, qapshyq tasysa, áiel adamdar tamaq pisirip, barlyǵy qolynan kelgen is-áreketti jasady.
«Aqordada» sý tasqynymen kúresken qaharmandar júzdesti. Olar bir-birine ne aitty?
Áliia Siǵýatqyzy Dosmuhanova, «Qurmet» ordeniniń iegeri:
Saltanatty marapattaýdan keiin shaǵyn fýrshet boldy. Bir-birimizdi alǵan tósbelgimizben emes, sý tasqynynan aman qalýymyzben quttyqtadyq. Sol kezde Halyk qaiyrymdylyq qorynyń quryltaishysy Timýr Qulybaevty kórip, oǵan qasiretke bei-jai qaramai, halyqqa qarjylai kómekteskeni úshin jeke óz atymnan alǵys bildirdim.
Asylanbek Muqtaruly Aqylbekov, «Eren eńbegi úshin» medaliniń iegeri:
Atyraý eriktilerinen bul saltanatty jiynǵa eki adam qatysty. Marapatymyzben bir-birimizdi quttyqtap, qýanyp, eńbegimizdiń baǵalanǵany úshin Prezidentimizge alǵysymyzdy bildirdik. Qarjylai kómek kórsetken biznes ókilderine de úlken raqmetimizdi aitamyz. Osyndai qiyn-qystaý kezeńde el úshin, jer úshin aianbai eńbek etken árbir adam marapatqa laiyq.
Oljas Abzaluly Sultanov, «Eren eńbegi úshin» medaliniń iegeri:
Aqordada bas qosqanda bárimiz ózara kelisip, Atyraý oblysyna, jalpy sý tasqynyna qarsy kúreste kómek kórsetken metsenattarǵa biraýyzdan raqmet aittyq. Qoldaý kórsetkenniń qandai paida alyp kelgenine olar ózderi de kýá boldy. Mundai qiyn-qystaý kezeńde metsenattar barynsha kómek kórsetýi kerek qoi. Kimniń kim ekeni osy kezde bilindi. Aqshasy bar bola tura bermegender de bar. Eshkimdi májbúrlemeidi ǵoi, biraq osyndai oqiǵa kezinde metsenattar qolynan kelgenshe is-áreket jasaýy qajet dep oilaimyn.
