Maǵaýov dizel otyny tapshylyǵy nelikten týyndaǵanyn aityp berdi
Birinshi kezekte vitse-ministr Áset Maratuly elimizde dizel otynyn tutyný kólemi ótken jylmen salystyrǵanda aitarlyqtai óskenin atap ótti. Onyń aitýynsha, biylǵy jazda halyq ótken jylmen salystyrǵanda 480 myń tonnadan astam dizel otynyn artyq paidalanǵan. Ótken jyly karantindik sharalardan keiin sharýalar dizel otyny az mólsherde tutynýy múmkin. Biraq ony Áset Maǵaýov esepke almaǵan syńaily.
Jalpy biyl aýyl sharýashylyǵy salasynda oryn alǵan qýańshylyqty eskersek, dizel otynyna degen suranystyń birshama artýyn baiqaýǵa bolar edi. Biyl sharýalar shabyndyqtan bólek sai-saladaǵy qamys-quraqtardy qýalai shaýyp, qysqa mal azyǵyn daiyndaýǵa kúsh saldy. Olar mundai jaǵdaida mólsherden tys dizel otynyn tutynatyny aitpasa da túsinikti. Muny QR Energetika ministrligi kúni-buryn boljap, qam jasaýy kerek edi. Ókinishke orai, ministrlik ókilderi aýyl sharýashylyǵyndaǵy jaǵdaiǵa bas aýyrtpaǵan syńaily.
Áset Maǵaýov elimizde dizel otynynyń tapshylyǵynyń taǵy bir basty sebei retinde Atyraý munai óńdeý zaýytynyń jospardan tys jumysyn toqtatýy áser etkenin de alǵa tartty. Osylaisha oilamaǵan jerden jumysyn toqtatqan munai óńdeý zaýytynyń kesirinen ishki naryqqa qajetti 230 myń tonna kólemindegi dizel otyny óndirilmei qalǵan. Bul da elimizde dizel otynyna degen tapshylyqty ýshyqtyrsa kerek.
Sonymen qatar jylda syrt elderden jetkiziletin dizel otynynyń tiisti mólsherde kelmeýi de otqa mai quiǵandai bolypty... Esterińizge salamyz, ótken jyly elimizge kórshiles Reseiden 500 myń tonna kóleminde dizel otyny eksporttalsa, biyl onyń mólsheri bar bolǵany 26 myń tonna qurapty. Osylaisha Áset Maratuly dizel otynyna degen tapshylyqtyń týyndaýyna qatysty basty sebepterin atap berdi.
Janar-jaǵarmaidyń tapshylyǵy oryn alǵanda kópshilik qaýym osy salaǵa jaýapty mekemeler «nege tapshylyqtyń aldyn almady» degen syn-eskertpeler aita bastaityny belgili. Biraq bul joly QR Energetika ministrligi erte kóktemde dizel otynynyń qory tómendegende kólik quraldarymen jáne temir jolmen kórshiles elderge dizel otynyn eksporttaýǵa shekteý qoiypty. Biraq bul shekteýlerdiń dizel otynyn tasymaldaýshylar qanshalyqty oryndaǵanyn vitse-ministr ashyp aitqan joq. Budan basqa ministrlik Atyraý men Shymkent munai óńdeý zaýyttaryna jospardan tys 100 myń tonna dizel otynyn óndirý týrasynda jańa mindet júktepti. Áiteýir QR Energetika ministrligi qarap qalmapty. Osy qabyldaǵan sharalar elimizde dizel otyny tapshylyǵyn joiý úshin birshama ýaqyt kerek. Endi sony kútýden basqa amal joq.
