Ulybrıtanıa Reseıdiń memlekettik «Rosatom» konserniniń azamattyq baǵyttaǵy úsh enshiles kompanıasyna atom salasyndaǵy halyqaralyq jobalar portfelin keńeıtýge qatysy bar degen sebeppen sanksıa engizdi, dep habarlaıdy Dalanews.kz.

Kezekti sanksıalyq paket aıasynda Rosatom energetıkalyq jobalary AQ-ǵa (Rosatom Energy Projects) jáne onyń basshysy Andreı Rojdestvınge, «Rosatom sheteldik generasıa» quramyna kiretin ınjınırıńtik ári konsaltıńtik REIN Engineering kompanıasyna, sondaı-aq Rýsatom Oversız jáne ony basqaratyn Ilá Vergızaevke qatysty engizildi. Bul qurylymdardyń barlyǵy álemdegi atom elektr stansıalaryn salý boıynsha eń iri portfelge ıe «Rosatomnyń» sheteldegi jobalarymen ártúrli deńgeıde baılanysty.

Máselen, «Rosatom energetıkalyq jobalary» 2022 jyly energetıka salasyndaǵy «Rosatomnyń» búkil ónim jelisin álemdik naryqta ilgeriletý jáne kelisimsharttarǵa qol jetkizý maqsatynda qurylǵan. Ulybrıtanıa bıligi atalǵan kompanıalardy sanksıalyq tizimge engizý sebebin shetelde jańa reseılik atom nysandaryn salý jóninde kelisimsharttar alýǵa talpynystarymen túsindirdi. Úkimettiń baspasóz habarlamasynda bul qadam munaı tabystarynyń tómendeýin óteıtin qosymsha energetıkalyq kiris kózin ashýy múmkin ekeni aıtylǵan.

«Rosatom» bul máselege qatysty pikir bildirýden bas tartty. Konsernniń ózi sanksıaǵa ilinbegen, alaıda onyń basshysy Alekseı Lıhachev buǵan deıin AQSH pen Ulybrıtanıanyń sanksıalyq tizimine engizilgen.

Ulybrıtanıa baǵalaýynsha, Reseıdiń Ýkraınaǵa qarsy soǵysy bastalǵan 2022 jyldan bergi eń aýqymdy sanksıalyq paket munaı salasyn, reseılik bankterdi, tankerlerdi jáne basqa da sektorlardy qamtydy. Sanksıalyq tizimge Reseı munaı eksportynyń 80%-yna jaýap beretin munaı tasymalynyń monopolısi Transneft te engizildi. Sonymen qatar Dýbaıda ornalasqan 2Rivers tobyna kiretin 175 kompanıa da shekteýlerge ushyrady. Ulybrıtanıa úkimeti bul topty álemdegi eń iri «kóleńkeli flot» operatorlarynyń biri ári reseılik munaıdyń iri treıderi dep atady.