Mańǵystaý oblysy Politsiia departamenti bastyǵy men dáriger ushaqta shetel azamatyn aman alyp qaldy, dep habarlaidy Dalanews.kz.
23 aqpanda Astanadan Aqtaýǵa baǵyt alǵan áýe reisinde 45 jastaǵy sheteldik jolaýshynyń qan qysymy kúrt kóterilip, oǵan bortta Politsiia departamentiniń bastyǵy Saǵyndyq Aiaǵanov pen dáriger Tursyn Shýishbaeva jedel kómektesken. Oqiǵa ushaq áýege kóterilgennen keiin shamamen bir saǵat ótken soń bolǵan.
Mańǵystaý oblystyq Politsiia departamentiniń bastyǵy Saǵyndyq Aiaǵanov Tájikstan Respýblikasynyń azamaty dálizde qulap bara jatqanyn baiqap, dereý áreket etken. Ol jolaýshyny ustap qalyp, bortserikterdi shaqyrǵan.
"Sol reispen eńbek demalysymnan Aqtaýǵa ushyp kele jatqan edim. Er adam ústime qarai qulap kele jatqanyn baiqap, ustap qaldym. Bortserikterdi shaqyryp, jolaýshylar arasynan dáriger izdei bastadyq. Baǵymyzǵa orai, dáriger tabyla ketti. Ózimmen birge únemi aspirin alyp júretin edim, azamatqa sol dárini usyndym. Ushaq jerge qonǵansha azamattyń jaǵdaiyn baqylap otyrdyq. Jalpy mundai jaǵdaida kez kelgen adam kómekteser edi. Muny azamattyq boryshym dep esepteimin", – dedi Saǵyndyq Aiaǵanov.
Jolaýshyǵa "Ana men bala" ortalyǵynyń dárigeri Tursyn Shýishbaeva meditsinalyq kómek kórsetken.
"Ushaqta er adamnyń qan qysymy 220/110-ǵa deiin kóterilgenin anyqtadyq. Dári berip, ottegi qosyp, jaǵdaiyn turaqtandyrdyq. Qan qysymyn 135/85-ke deiin túsirdik. Jolaýshy samai tusy "qainaǵan sý quiǵandai" aýyrǵanyn aitty. Jolaýshylar arasynan kaptopril men aspirin tabyldy. Ol bir ai buryn óz elinde osyndai jaǵdaimen aýrýhanaǵa túskeni, alaida dáriger keńesin tolyq oryndamaǵany belgili boldy", – deidi dáriger.
Ushaq Aqtaýǵa qonǵan soń jedel járdem qyzmeti naýqasty aýrýhanaǵa jetkizgen. Qazir onyń jaǵdaiy turaqty. Tájikstan azamaty ózine der kezinde kómektesken jandarǵa alǵys bildirdi.
