ماڭعىستاۋ وبلىسى پوليتسييا دەپارتامەنتٸ باستىعى مەن دەرٸگەر ۇشاقتا شەتەل ازاماتىن امان الىپ قالدى, دەپ حابارلايدى Dalanews.kz.
23 اقپاندا استانادان اقتاۋعا باعىت العان ەۋە رەيسٸندە 45 جاستاعى شەتەلدٸك جولاۋشىنىڭ قان قىسىمى كٷرت كٶتەرٸلٸپ, وعان بورتتا پوليتسييا دەپارتامەنتٸنٸڭ باستىعى ساعىندىق اياعانوۆ پەن دەرٸگەر تۇرسىن شۋيشباەۆا جەدەل كٶمەكتەسكەن. وقيعا ۇشاق ەۋەگە كٶتەرٸلگەننەن كەيٸن شامامەن بٸر ساعات ٶتكەن سوڭ بولعان.
ماڭعىستاۋ وبلىستىق پوليتسييا دەپارتامەنتٸنٸڭ باستىعى ساعىندىق اياعانوۆ تەجٸكستان رەسپۋبليكاسىنىڭ ازاماتى دەلٸزدە قۇلاپ بارا جاتقانىن بايقاپ, دەرەۋ ەرەكەت ەتكەن. ول جولاۋشىنى ۇستاپ قالىپ, بورتسەرٸكتەردٸ شاقىرعان.
"سول رەيسپەن ەڭبەك دەمالىسىمنان اقتاۋعا ۇشىپ كەلە جاتقان ەدٸم. ەر ادام ٷستٸمە قاراي قۇلاپ كەلە جاتقانىن بايقاپ, ۇستاپ قالدىم. بورتسەرٸكتەردٸ شاقىرىپ, جولاۋشىلار اراسىنان دەرٸگەر ٸزدەي باستادىق. باعىمىزعا وراي, دەرٸگەر تابىلا كەتتٸ. ٶزٸممەن بٸرگە ٷنەمٸ اسپيرين الىپ جٷرەتٸن ەدٸم, ازاماتقا سول دەرٸنٸ ۇسىندىم. ۇشاق جەرگە قونعانشا ازاماتتىڭ جاعدايىن باقىلاپ وتىردىق. جالپى مۇنداي جاعدايدا كەز كەلگەن ادام كٶمەكتەسەر ەدٸ. مۇنى ازاماتتىق بورىشىم دەپ ەسەپتەيمٸن", – دەدٸ ساعىندىق اياعانوۆ.
جولاۋشىعا "انا مەن بالا" ورتالىعىنىڭ دەرٸگەرٸ تۇرسىن شۋيشباەۆا مەديتسينالىق كٶمەك كٶرسەتكەن.
"ۇشاقتا ەر ادامنىڭ قان قىسىمى 220/110-عا دەيٸن كٶتەرٸلگەنٸن انىقتادىق. دەرٸ بەرٸپ, وتتەگٸ قوسىپ, جاعدايىن تۇراقتاندىردىق. قان قىسىمىن 135/85-كە دەيٸن تٷسٸردٸك. جولاۋشى ساماي تۇسى "قايناعان سۋ قۇيعانداي" اۋىرعانىن ايتتى. جولاۋشىلار اراسىنان كاپتوپريل مەن اسپيرين تابىلدى. ول بٸر اي بۇرىن ٶز ەلٸندە وسىنداي جاعدايمەن اۋرۋحاناعا تٷسكەنٸ, الايدا دەرٸگەر كەڭەسٸن تولىق ورىنداماعانى بەلگٸلٸ بولدى", – دەيدٸ دەرٸگەر.
ۇشاق اقتاۋعا قونعان سوڭ جەدەل جەردەم قىزمەتٸ ناۋقاستى اۋرۋحاناعا جەتكٸزگەن. قازٸر ونىڭ جاعدايى تۇراقتى. تەجٸكستان ازاماتى ٶزٸنە دەر كەزٸندە كٶمەكتەسكەن جاندارعا العىس بٸلدٸردٸ.
