AQSh memlekettik hatshysy Marko Rýbio Kýbada amerikalyq katerge qatysty bolǵan oqiǵa jan-jaqty tekserilip jatqanyn málimdedi. Onyń aitýynsha, AQSh úkimetiniń túrli ókili ázirge tolyq anyqtalmaǵan jaittardy naqtylaýmen ainalysyp jatyr, dep habarlaidy Dalanews.kz.
Rýbio Vashington bul máselede tek Kýba biligi usynǵan aqparatpen shektelmeitinin atap ótti.
"Qazir atalǵan is boiynsha tekseris júrgizilip jatyr", - dedi ol.
Jýrnalisterdiń oqiǵa AQSh úkimetimen bailanysty bolýy múmkin be degen saýalyna Marko Rýbio qysqa qaiyryp, "Joq" dep jaýap berdi.
Aita keteiik, Kýba biliginiń málimetinshe, eldiń aýmaǵyna kirgen amerikalyq katerdiń bortynda AQSh-ta turýǵa ruqsaty bar kýbalyqtar bolǵan. Olardyń janynan shabýyldaýshy vintovkalar, qol granatalary jáne ózge de qarý túrleri tabylǵany habarlandy. Barlyǵy alty adam ustalǵan. Olardyń ekeýi Kýba aýmaǵynda nemese ózge elderde terroristik áreketterdi uiymdastyrýǵa, qarjylandyrýǵa ne qoldaýǵa qatysy bar degen kúdikpen izdeýde bolǵan.
Aldyn ala derek boiynsha, 26 aqpanǵa qaraǵan túni Kýbanyń shekara qyzmeti eldiń aýmaǵyna zańsyz kirgen AQSh-tyń azamattyq katerine jaýap retinde oq atqan. Saldarynan tórt adam qaza taýyp, altaýy jaralanǵan. Kýba tarapy kater jolaýshylary aralǵa terroristik maqsatpen ótpek bolǵan dep málimdep otyr.
