اقش مەملەكەتتىك حاتشىسى ماركو رۋبيو كۋبادا امەريكالىق كاتەرگە قاتىستى بولعان وقيعا جان-جاقتى تەكسەرىلىپ جاتقانىن مالىمدەدى. ونىڭ ايتۋىنشا، اقش ۇكىمەتىنىڭ ءتۇرلى وكىلى ازىرگە تولىق انىقتالماعان جايتتاردى ناقتىلاۋمەن اينالىسىپ جاتىر، دەپ حابارلايدى Dalanews.kz.
رۋبيو ۆاشينگتون بۇل ماسەلەدە تەك كۋبا بيلىگى ۇسىنعان اقپاراتپەن شەكتەلمەيتىنىن اتاپ ءوتتى.
"ءقازىر اتالعان ءىس بويىنشا تەكسەرىس جۇرگىزىلىپ جاتىر"، - دەدى ول.
جۋرناليستەردىڭ وقيعا اقش ۇكىمەتىمەن بايلانىستى بولۋى مۇمكىن بە دەگەن ساۋالىنا ماركو رۋبيو قىسقا قايىرىپ، "جوق" دەپ جاۋاپ بەردى.
ايتا كەتەيىك، كۋبا بيلىگىنىڭ مالىمەتىنشە، ەلدىڭ اۋماعىنا كىرگەن امەريكالىق كاتەردىڭ بورتىندا اقش-تا تۇرۋعا رۇقساتى بار كۋبالىقتار بولعان. ولاردىڭ جانىنان شابۋىلداۋشى ۆينتوۆكالار، قول گراناتالارى جانە وزگە دە قارۋ تۇرلەرى تابىلعانى حابارلاندى. بارلىعى التى ادام ۇستالعان. ولاردىڭ ەكەۋى كۋبا اۋماعىندا نەمەسە وزگە ەلدەردە تەرروريستىك ارەكەتتەردى ۇيىمداستىرۋعا، قارجىلاندىرۋعا نە قولداۋعا قاتىسى بار دەگەن كۇدىكپەن ىزدەۋدە بولعان.
الدىن الا دەرەك بويىنشا، 26 اقپانعا قاراعان ءتۇنى كۋبانىڭ شەكارا قىزمەتى ەلدىڭ اۋماعىنا زاڭسىز كىرگەن اقش-تىڭ ازاماتتىق كاتەرىنە جاۋاپ رەتىندە وق اتقان. سالدارىنان ءتورت ادام قازا تاۋىپ، التاۋى جارالانعان. كۋبا تاراپى كاتەر جولاۋشىلارى ارالعا تەرروريستىك ماقساتپەن وتپەك بولعان دەپ مالىمدەپ وتىر.
