Tamaqtan keıin aǵzada kúrdeli as qorytý prosesi bastalady. Asqazan-ishek joly taǵamdy qarapaıym zattarǵa deıin ydyratyp, ony sińirýge daıyndaıdy. Biraq osy kezde jasalatyn keıbir kúndelikti ádetter as qorytýǵa kedergi keltirip, aýyrlyq, júrek aıný sekildi jaısyzdyqtarǵa ákelýi múmkin. Tamaqtan keıin qandaı áreketter jasamaǵan jón? Tolyǵyraq Dalanews.kz saıtynda.

Tamaqtan soń jatyp demalý

Kópshilik toıyp tamaq ishkennen keıin jatyp demalǵysy keledi. Alaıda bul asqazan qyshqylynyń óńeshke keri ótýine (reflúks) sebep bolýy múmkin. Sonyń saldarynan qyjyl, jaısyzdyq paıda bolady. Dárigerler tamaqtan keıin keminde 1–2 saǵat jatpaýǵa keńes beredi.

Temeki shegý

Temeki as qorytý júıesine keri áser etedi. Nıkotın asqazannyń jumysyn baıaýlatyp, gastrıt pen oıyq jaranyń paıda bolý qaýpin arttyrady. Eger bul ádetten birden bas tartý qıyn bolsa, kem degende 30–45 mınýttan keıin ǵana shekken durys.

Sportpen aınalysý

Tamaqtan keıin birden jattyǵý jasaý ishtiń túıilýine, aýyrlyqqa jáne reflúkske ákelýi múmkin. Sebebi qan bul kezde asqazannan bulshyqetterge aýysady. Belsendi jattyǵýǵa deıin 1–2 saǵat kútken jón.

Monshaǵa nemese ystyq dýshqa túsý

Joǵary temperatýra qan aınalymyn ózgertedi: qan terige kóbirek baryp, as qorytý baıaýlaıdy. Bul bas aınalýǵa da sebep bolýy múmkin. Tamaqtan keıin biraz ýaqyt ótken soń ǵana monshaǵa barǵan durys.

Sýyq sýsyn ishý

Sýyq sý asqazandaǵy qan tamyrlaryn taryltyp, as qorytý prosesin baıaýlatýy múmkin. Sonymen qatar ystyq taǵamnan keıin sýyq ishý tis emaline zıan. Bólme temperatýrasyndaǵy sýdy tańdaǵan durys.

Desert jeý

Tátti taǵamdar tez qorytylady. Al aýyr tamaqtan keıin jese, ish kebýi men jaısyzdyq týǵyzýy múmkin. Desertti bólek ýaqytqa qaldyrǵan jón.

Taǵy qandaı ádetter zıan?

• Kofeni shamadan tys ishý – asqazan qyshqylyn arttyrady

• Artyq tamaqtaný – asqazanǵa kúsh túsiredi

• Stress jaǵdaıynda tamaqtaný – as qorytý prosesin buzady

Tamaqtan keıingi qarapaıym ádetter densaýlyqqa tikeleı áser etedi. Durys rejımdi saqtap, zıandy áreketterden bas tartý – as qorytýdy jaqsartyp, kóptegen máselelerdiń aldyn alýǵa kómektesedi.