Olimpiada júldegeri, tanymal sport qairatkeri Islam Bairamýkov áleýmettik jelidegi paraqshasynda qazaqstandyq sport salasyndaǵy sońǵy daýly máselelerge qatysty pikir bildirdi, dep habarlaidy dalanews.kz.
Ol óz sózinde mánerlep syrǵanaýshy Mihail Shaidorovtyń jetistigin erekshe atap ótip, sportshynyń tarihi jeńisi el úshin úlken qýanysh bolǵanyn aitty.
«Mihail Shaidorov biylǵy Olimpiada chempiony atanyp, barshamyzdy qýantty. Bul – 32 jyl ishindegi alǵashqy altyn medal. Munyń bári úlken eńbektiń arqasy. Sondyqtan biz búkil el bolyp ony qurmetteýimiz kerek», – dedi Islam Bairamýkov.
Sondai-aq ol sporttaǵy tártip pen birliktiń mańyzyn atap ótti.
«Sport tártiptiń arqasynda damidy. Tártip bolǵan jerde nátije bolady. Baýyrjan Momyshuly atamyz aitqandai, “Tártipsiz el bolmaidy, tártipke bas igen qul bolmaidy”. Bul máseleniń eshqandai kúrdeli problemasy joq, jai ǵana otyryp sóilesetin jaǵdai», – dedi ol.
Bairamýkov qazirgi ýaqytta áleýmettik jelilerde túrli pikirlerdiń kóbeiip ketkenine toqtalyp, qoǵamdaǵy kei máseleler kezinde tiisti deńgeide qoldaý tappaǵanyn eske saldy. Mysal retinde ol 2021 jyly Almatydaǵy Respýblikalyq sport kolledjiniń jabylýy men Almaty ippodromyna qatysty máselelerdi atady.
Onyń aitýynsha, sol kezde sport qaýymdastyǵy birneshe ret dabyl qaqqanymen, qoǵam tarapynan jetkilikti rezonans bolmaǵan.
Sonymen qatar Olimpiada júldegeri qazirgi tańda sport salasynda oń ózgerister baiqalyp jatqanyn aitty.
«Búginde sportta zamanaýi tásilder men ádistemeler engizilip jatyr, halyqaralyq bailanystar nyǵaiýda. Memleket basshysynyń halyqaralyq federatsiia basshylaryn qabyldap, memlekettik nagradalar tapsyrýy – úlken qoldaý. Bul bolashaq jeńisterdiń kepili», – dedi Islam Bairamýkov.
Sóz sońynda ol eldegi sport qaýymdastyǵyn birlikke shaqyryp, «Bizdiń kúshimiz – birlikte!» ekenin atap ótti.
