وليمپيادا جٷلدەگەرٸ, تانىمال سپورت قايراتكەرٸ يسلام بايرامۋكوۆ ەلەۋمەتتٸك جەلٸدەگٸ پاراقشاسىندا قازاقستاندىق سپورت سالاسىنداعى سوڭعى داۋلى مەسەلەلەرگە قاتىستى پٸكٸر بٸلدٸردٸ, دەپ حابارلايدى dalanews.kz.
ول ٶز سٶزٸندە مەنەرلەپ سىرعاناۋشى ميحايل شايدوروۆتىڭ جەتٸستٸگٸن ەرەكشە اتاپ ٶتٸپ, سپورتشىنىڭ تاريحي جەڭٸسٸ ەل ٷشٸن ٷلكەن قۋانىش بولعانىن ايتتى.
«ميحايل شايدوروۆ بيىلعى وليمپيادا چەمپيونى اتانىپ, بارشامىزدى قۋانتتى. بۇل – 32 جىل ٸشٸندەگٸ العاشقى التىن مەدال. مۇنىڭ بەرٸ ٷلكەن ەڭبەكتٸڭ ارقاسى. سوندىقتان بٸز بٷكٸل ەل بولىپ ونى قۇرمەتتەۋٸمٸز كەرەك», – دەدٸ يسلام بايرامۋكوۆ.
سونداي-اق ول سپورتتاعى تەرتٸپ پەن بٸرلٸكتٸڭ ماڭىزىن اتاپ ٶتتٸ.
«سپورت تەرتٸپتٸڭ ارقاسىندا داميدى. تەرتٸپ بولعان جەردە نەتيجە بولادى. باۋىرجان مومىشۇلى اتامىز ايتقانداي, “تەرتٸپسٸز ەل بولمايدى, تەرتٸپكە باس يگەن قۇل بولمايدى”. بۇل مەسەلەنٸڭ ەشقانداي كٷردەلٸ پروبلەماسى جوق, جاي عانا وتىرىپ سٶيلەسەتٸن جاعداي», – دەدٸ ول.
بايرامۋكوۆ قازٸرگٸ ۋاقىتتا ەلەۋمەتتٸك جەلٸلەردە تٷرلٸ پٸكٸرلەردٸڭ كٶبەيٸپ كەتكەنٸنە توقتالىپ, قوعامداعى كەي مەسەلەلەر كەزٸندە تيٸستٸ دەڭگەيدە قولداۋ تاپپاعانىن ەسكە سالدى. مىسال رەتٸندە ول 2021 جىلى الماتىداعى رەسپۋبليكالىق سپورت كوللەدجٸنٸڭ جابىلۋى مەن الماتى يپپودرومىنا قاتىستى مەسەلەلەردٸ اتادى.
ونىڭ ايتۋىنشا, سول كەزدە سپورت قاۋىمداستىعى بٸرنەشە رەت دابىل قاققانىمەن, قوعام تاراپىنان جەتكٸلٸكتٸ رەزونانس بولماعان.
سونىمەن قاتار وليمپيادا جٷلدەگەرٸ قازٸرگٸ تاڭدا سپورت سالاسىندا وڭ ٶزگەرٸستەر بايقالىپ جاتقانىن ايتتى.
«بٷگٸندە سپورتتا زاماناۋي تەسٸلدەر مەن ەدٸستەمەلەر ەنگٸزٸلٸپ جاتىر, حالىقارالىق بايلانىستار نىعايۋدا. مەملەكەت باسشىسىنىڭ حالىقارالىق فەدەراتسييا باسشىلارىن قابىلداپ, مەملەكەتتٸك ناگرادالار تاپسىرۋى – ٷلكەن قولداۋ. بۇل بولاشاق جەڭٸستەردٸڭ كەپٸلٸ», – دەدٸ يسلام بايرامۋكوۆ.
سٶز سوڭىندا ول ەلدەگٸ سپورت قاۋىمداستىعىن بٸرلٸككە شاقىرىپ, «بٸزدٸڭ كٷشٸمٸز – بٸرلٸكتە!» ەكەنٸن اتاپ ٶتتٸ.
