Aqtóbede 33 jastaǵy er adamnyń ólimine qatysty is boiynsha sot úkimi jariialandy, dep habarlaidy Dalanews.kz.
Sottalýshy Kseniia Sedova «affekt kúiinde jasalǵan kisi óltirý» baby boiynsha kináli dep tanylyp, 1 jyl 6 aiǵa bas bostandyǵynan aiyryldy, alaida amnistiiaǵa ilinip, sot zalynan bosatyldy.
Oqiǵa 2025 jyldyń sáýir aiynda bolǵan. Tergeý deregine sáikes, erli-zaiyptylar arasyndaǵy janjal kezinde áiel kúieýine pyshaq suǵyp, saldarynan ol kóz jumǵan. Alǵashynda Kseniia Sedovaǵa qatysty qylmystyq is qozǵalyp, ol qamaýǵa alynǵan. Keiin is «affekt kúiinde jasalǵan kisi óltirý» babyna qaita saralanyp, amnistiiaǵa bailanysty bosatylǵan. Alaida tergeý qaita jandanyp, prokýratýra ony qasaqana adam óltirý baby boiynsha aiyptap, is mamandandyrylǵan qylmystyq sotqa joldanǵan.
Sotta aiyptalýshy kúieýin qasaqana óltirý nieti bolmaǵanyn, uzaq ýaqyt boiy zorlyq-zombylyq kórgenin aitty. Onyń sózinshe, 2025 jylǵy 29 sáýirde kúieýi mas kúiinde balaǵattap, uryp-soqqan, tunshyqtyrǵan. Qorqynysh pen sharasyzdyq jaǵdaiynda ol ózin qorǵaý úshin pyshaq alǵan.
Aiyptalýshy oqiǵadan keiin kúieýine alǵashqy kómek kórsetip, jedel járdem shaqyrǵanyn alǵa tartty. Bul onyń óltirý nieti bolmaǵanyn kórsetedi dep málimdedi qorǵaýshysy.
Sotta kýágerler Kseniianyń kúieýi tarapynan júieli túrde zorlyq kórgenin aitqan. Áriptesteri onyń denesindegi kógergen izderdi birneshe ret baiqaǵandaryn jetkizgen. Sot-meditsinalyq sarapshylar da aiyptalýshy pyshaq salǵan sátte affekt kúiinde bolǵanyn málimdegen.
Sot jaryssózinde memlekettik aiyptaýshy qasaqana adam óltirý aiybynan bas tartyp, isti «affekt kúiinde jasalǵan kisi óltirý» babyna qaita saralaýdy suraǵan. Sonymen qatar 1 jyl 6 ai bas bostandyǵynan aiyrý jazasyn taǵaiyndap, «Amnistiia týraly» zańǵa sáikes bosatýdy usynǵan.
Sýdia Seitjaparov úkimdi jariialai otyryp, aiyptalýshynyń áreketi uzaq ýaqytqa sozylǵan psihologiialyq qysym men zorlyq-zombylyq saldarynan týyndaǵan kúshti jan kúizelisi jaǵdaiynda jasalǵanyn atap ótti. Atalǵan bap ortasha aýyr qylmys sanatyna jatady jáne oǵan úsh jylǵa deiin bas bostandyǵyn shekteý nemese aiyrý jazasy qarastyrylǵan.
Sot sheshimimen Kseniia Sedova 5 mln teńge moraldyq ótemaqy tóleýge mindetteldi. Jábirlenýshi tarap 20 mln teńge suraǵan.
Marqumnyń anasy sotta ulyn «qubyjyq etip kórsetip jatyr» dep málimdedi. Onyń aitýynsha, uly jumys istegen, ishimdikke salynbaǵan, al erli-zaiyptylar arasyndaǵy janjalǵa áieldiń ózi de sebep bolǵan.
Úkim zańdy kúshine engen joq.
Aita keteiik, bul is respýblika kóleminde keń rezonans týdyrdy. Kseniia Sedovany turmystyq zorlyq-zombylyq qurbandaryna kómek kórsetetin «Ne Molchi» qorynyń quqyq qorǵaýshylary qoldaǵan.
