Áleýmettik jelilerde mektep dálizinde oqýshylardyń toptasyp turǵany beinelengen video tarady. Atalǵan jaǵdai Aqtaý qalasyndaǵy №11 litseide bolǵany anyqtaldy, dep habarlaidy Dalanews.kz.
Mańǵystaý oblysynyń bilim basqarmasynyń málimetinshe, oqiǵa 2026 jylǵy 23 aqpanda tirkelgen. Sol kúni ekinshi aýysymda bilim alyp jatqan oqýshylardyń altynshy sabaǵy aiaqtalǵan soń, olar jappai garderobqa barǵan. Sonyń saldarynan dálizde shamamen úsh minýtqa sozylǵan ýaqytsha keptelis oryn alǵan.
Bilim basqarmasy bul sátte mektep tarapynan baqylaý uiymdastyrylǵanyn atap ótti.
"Osy ýaqytta kezekshi muǵalimder men mektep ákimshiligi tarapynan baqylaý júrgizildi", - delingen resmi habarlamada.
Júrgizilgen tekserý nátijesinde quqyqbuzýshylyqtar anyqtalmaǵan. Eń bastysy, quzyrly organ oqýshylardyń ómiri men densaýlyǵyna eshqandai qaýip tónbegenin málimdedi. Basqarma ókilderiniń aitýynsha, jaǵdai tolyq baqylaýda bolǵan.
Sonymen qatar mektep ákimshiligine qaýipsizdik talaptaryn kúsheitý jóninde tapsyrma berildi. Qazirgi ýaqytta bilim ordasynda oqý protsesi qalypty rejimde jalǵasyp jatyr. Másele bilim bóliminiń baqylaýynda ekeni de habarlandy.
Eske salaiyq, buǵan deiin Almaty qalasynda osyndai jaǵdai tirkelip, onyń saldarynan mektep direktory qyzmetinen bosatylǵan edi.
Mańǵystaý oblysynyń bilim basqarmasy turǵyndardy tek resmi derekkózderge súienýge shaqyryp, jalǵan ári tekserilmegen aqparatqa senbeýdi surady.
