الەۋمەتتىك جەلىلەردە مەكتەپ دالىزىندە وقۋشىلاردىڭ توپتاسىپ تۇرعانى بەينەلەنگەن ۆيدەو تارادى. اتالعان جاعداي اقتاۋ قالاسىنداعى №11 ليسەيدە بولعانى انىقتالدى، دەپ حابارلايدى Dalanews.kz.

ماڭعىستاۋ وبلىسىنىڭ ءبىلىم باسقارماسىنىڭ مالىمەتىنشە، وقيعا 2026 جىلعى 23 اقپاندا تىركەلگەن. سول كۇنى ەكىنشى اۋىسىمدا ءبىلىم الىپ جاتقان وقۋشىلاردىڭ التىنشى ساباعى اياقتالعان سوڭ، ولار جاپپاي گاردەروبقا بارعان. سونىڭ سالدارىنان دالىزدە شامامەن ءۇش مينۋتقا سوزىلعان ۋاقىتشا كەپتەلىس ورىن العان.

ءبىلىم باسقارماسى بۇل ساتتە مەكتەپ تاراپىنان باقىلاۋ ۇيىمداستىرىلعانىن اتاپ ءوتتى.

"وسى ۋاقىتتا كەزەكشى مۇعالىمدەر مەن مەكتەپ اكىمشىلىگى تاراپىنان باقىلاۋ جۇرگىزىلدى"، - دەلىنگەن رەسمي حابارلامادا.

جۇرگىزىلگەن تەكسەرۋ ناتيجەسىندە قۇقىقبۇزۋشىلىقتار انىقتالماعان. ەڭ باستىسى، قۇزىرلى ورگان وقۋشىلاردىڭ ءومىرى مەن دەنساۋلىعىنا ەشقانداي ءقاۋىپ تونبەگەنىن مالىمدەدى. باسقارما وكىلدەرىنىڭ ايتۋىنشا، جاعداي تولىق باقىلاۋدا بولعان.

سونىمەن قاتار مەكتەپ اكىمشىلىگىنە قاۋىپسىزدىك تالاپتارىن كۇشەيتۋ جونىندە تاپسىرما بەرىلدى. قازىرگى ۋاقىتتا ءبىلىم ورداسىندا وقۋ پروسەسى قالىپتى رەجيمدە جالعاسىپ جاتىر. ماسەلە ءبىلىم ءبولىمىنىڭ باقىلاۋىندا ەكەنى دە حابارلاندى.

ەسكە سالايىق، بۇعان دەيىن الماتى قالاسىندا وسىنداي جاعداي تىركەلىپ، ونىڭ سالدارىنان مەكتەپ ديرەكتورى قىزمەتىنەن بوساتىلعان ەدى.

ماڭعىستاۋ وبلىسىنىڭ ءبىلىم باسقارماسى تۇرعىنداردى تەك رەسمي دەرەككوزدەرگە سۇيەنۋگە شاقىرىپ، جالعان ءارى تەكسەرىلمەگەن اقپاراتقا سەنبەۋدى سۇرادى.