Shyǵys Qazaqstan oblysynyń sportshysy Faina Meiirmanova ótken jyldyń qarasha aiynda Tokio qalasynda ótken HHV jazǵy Sýrdlimpiada oiyndarynda altyn medal jeńip alǵan. Oblys basshysy chempionǵa qurmet kórsetip, páter kiltin tabystady, dep habarlaidy Dalanews.kz
Jeńil atletikadan biiktikke sekirý saiysynda ol 1,79 metr nátijesin kórsetip, qarsylastarynan basym tústi. Osylaisha, jarys rekordyn jańartyp, Sýrdlimpiada chempiony atandy.
Sýrdlimpiada oiyndary - estý qabileti buzylǵan sportshylar arasyndaǵy eń iri halyqaralyq jarys.
Ol Halyqaralyq sańyraýlar sport komitetiniń qoldaýymen ótkiziledi. Fainanyń jeńisi Qazaqstan ulttyq quramasynyń qorjynyn toltyryp, Shyǵys Qazaqstandaǵy sporttyń joǵary deńgeiin aiqyndady.
Faina Meiirmanova Qazaqstan ulttyq quramasynyń negizgi sapynda óner kórsetedi. Onyń jetistikteri - kópjyldyq júieli daiyndyqtyń, bapkerler shtabynyń kásibi eńbeginiń jáne óńirdegi sport uiymdarynyń qoldaýynyń nátijesi.
Shyǵys Qazaqstan oblysynyń ákimi Nurymbet Saqtaǵanov Faina Meiirmanovaǵa sporttaǵy aitarlyqtai jetistikteri úshin úsh bólmeli páterdiń sertifikaty men kiltin tabystady.
«Sportshymyzdyń jeńisi elimizdiń halyqaralyq bedelin nyǵaityp, qaisarlyq pen tabandylyqtyń jarqyn úlgisin kórsetip otyr”,- dep atap ótti aimaq basshysy.
Óz kezeginde Faina jaýapty sátte tolqýǵa berilmeýge tyrysqanyn aitty. Páter kilti onyń eńbegine berilgen laiyqty baǵa. Kezdesý sońynda sportshy bapkeri Bogdan Veselskiige jáne qoldaý kórsetken barsha jankúierlerine alǵys bildirdi.
