Nura aýdanynda quqyqtyq tártip pen qoǵamdyq qaýipsizdikti qamtamasyz etýge baǵyttalǵan jergilikti reidtik is-sharalar ótkizildi, dep habarlaidy Dala news.
Tekserý sharalary turǵyn úi sektoryn, jaldamaly páterlerdi, hostelderdi, qurylys nysandaryn, saýda úilerin jáne quqyq buzýshylyq jasalýy múmkin ózge de oryndardy qamtydy. Politsiia qyzmetkerleri kóshi-qon zańnamasynyń saqtalýyn, azamattardyń turǵylyqty jeri boiynsha tirkelýin baqylap, profilaktikalyq esepte turǵan tulǵalarmen mekenjailyq jumys júrgizdi.
Is-shara barysynda izdeýde júrgen azamattardy anyqtaýǵa, zańsyz eńbek qyzmeti men sheteldik jumys kúshin zańsyz tartý derekterine erekshe nazar aýdaryldy. Keshki ýaqytta oiyn-saýyq oryndary tekserilip, alkogol ónimderin satý talaptarynyń saqtalýy qadaǵalandy.
Sonymen qatar aýlalardy aralaý kezinde internet-alaiaqtyqtyń aldyn alý boiynsha túsindirý jumystary júrgizildi. Politsiia qyzmetkerleri, ásirese, egde jastaǵy turǵyndarmen áńgime ótkizip, aqparattyq paraqshalar taratty jáne turǵyndar chattaryna eskertý materialdaryn joldady.
Reid qorytyndysy boiynsha 160-qa jýyq adam ákimshilik jaýapkershilikke tartyldy. Atap aitqanda, 84 abattandyrý qaǵidalaryn buzý deregi tirkelgen. Budan bólek, kóshi-qon zańnamasyn buzý, belgilenbegen oryndarda kalian shegýdiń 11 faktisi, tynyshtyqty buzý, qoǵamdyq oryndarda alkogol ishý, spirttik ishimdikterdi zańsyz satý, kámeletke tolmaǵandardyń túngi ýaqytta eresektersiz júrýi jáne ózge de quqyq buzýshylyqtar anyqtalǵan.
Is-sharalarǵa politsiianyń túrli qyzmetteri men Ulttyq ulannyń áskeri qyzmetshileri jumyldyryldy.
Politsiia departamenti turǵyndardy júrgizilip jatqan jumystarǵa túsinistikpen qaraýǵa shaqyryp, qoǵamdyq tártipti qamtamasyz etý – memleket pen qoǵamnyń ortaq mindeti ekenin eske saldy.
