Talǵarda bir top buzaqynyń qolynan qaza tapqan 16 jastaǵy Sherzat Bolattyń ata-anasy men qos qorǵaýshysy kópshilikke málimdeme jasady, dep habarlaidy Dalanews.kz.
Olar istiń mán-jaiyn Airan YouTube arnasyna baiandady.
“Qazirgi kezde ata-anamyzben turyp jatyrmyz. Órtenip ketken úiimizge ótemaqy tólenbedi. Ákimdikten eshqandai kómek bolmady. Adamdar arasynda otbasymyz jylý jinap jatyr degen sybys tarady. Bizdiń buǵan esh qatysymyz joq. Men buǵan bailanysty túsinikteme berdim. Sondai-aq buǵan deiin kórsetilgen qysym toqtady. Qazirgi kezde qorqytyp-úrkitý joq. Barlyǵy tynysh ”, - deidi marqumnyń ákesi Qarjaýbai Nurymov.
Qazirgi kezde Nurymovtardyń shaǵyn dúkenderi jumysyn toqtatqan. Aitýlarynsha, jaqynda et dúkenin ashyp, is bastaýdy qaita qolǵa alǵan.
“Qazirgi tańda men aqsha tólenbeitin ýaqytsha eńbek demalysyndamyn. Dúkenimiz jumys istep turǵan joq. Alaida bizde shaǵyn kásibimiz bar. Kesheli beri et dúkenin ashyp, sony júrgizip jatyrmyz”, - deidi marqumnyń ákesi.
Marqumnyń ata-anasy Sherzattyń qazasy orny tolmas qaiǵy ekenin atap ótti.
“Biz kún saiyn Sherzatty eske alamyz. Onyń orny erekshe edi. Sol úshin de qazasy aýyr soqqy bolyp tidi. Sherzat erkindikke jany qushtar, erjúrek, qoly ashyq jan edi”, - deidi marqumnyń anasy Gúlbara Beishimbaeva.
Marqumnyń ákesi de balasynyń kópshil bolǵanyn aitady.
“Sherzat týraly kóp aitýǵa bolady. Mektepte jaqsy oqydy. Qyrsyq bolsa da, minezi sabyrly edi. Dostary da kóp boldy. Menen bir aiyrmashylyǵy, ony kóbi tanityn, bárine kómektesip júretin. Ol ómirdi qatty jaqsy kórdi. 16 jyl ǵumyr keshse de, osy jyldar aralyǵynda bizge kóptegen qýanysh syilai bildi. Jaqyndary úshin janyn berýge daiyn turatyn”, - deidi ol.
Marqumnyń ata-anasy qaiǵyly oqiǵa bolǵan túndi de esterine aldy.
“Sherzat qaza tapqan túni biz sol orynǵa ájesi ekeýimiz bardyq. Men ana retinde olardan óltirmeýin suradym. Olar meniń sózime qulaq aspady. Sherzat pen joldasymnyń inisin aiaýsyz soqqyǵa jyqty”, - deidi anasy Gúlbara Beishimbaeva.
Ákesi kúdiktiniń alaýyzdyq týdyrǵanyn aitady.
“Sol túni dúkenge Darhan degen jigit kelip, syra aldy. Men ol jigitke balamnyń kishkentai ekenin aityp, tiispeýin suradym. Darhan boqaýyz sóz aityp, ózi alaýyzdyq týdyrdy. Sherzat onyń jaǵyn syndyrmady. Sebebi olardy birden ajyratyp aldym. Ulyma da eskertý jasap, ana jigitti de tynyshtandyrǵym keldi. Ol meni tyńdamady. Dostaryn shaqyra bastady. Men de erkekpin, meniń de dostarym bar. Dál sol sekildi Nurqanat pen Sherzattyń da dostary kóp. Alaida biz olardy shaqyrmadyq”, — deidi ol.
Al kúdiktilerdiń ata-analary marqumnyń otbasyna kiná taǵyp jatqan kórinedi.
“Olar barlyǵyn ádeii istedi. Tipti Sherzattyń jasóspirim ekenin de elemedi. Qazir kúdiktilerdiń ata-analary sol orynda bolǵandai keiip tanytyp jatyr. Olar balalarynyń qandai ekenin bilmeidi jáne bizge kiná artyp jatyr. Kúdiktilerdi ómir boiyna bas bostandyǵynan aiyrýdy talap etemiz”, — deidi marqumnyń anasy.
Qarjaýbai Nurymov tipti olardyń kóńil aityp kelmgenderin de alǵa tartty.
“Men olarǵa aýyr sóz aitqym kelmeidi. Biraq olardyń ákelerine aitqym keledi, olardyń da balalary bar. Áke balasy úshin jaýap beredi. Tipti olar kóńil aitýǵa da kelmedi”, - deidi ol.
Qarjaýbai Nurymov otbasynyń bolashaǵyna alańdaidy. Qazirgi tańda olar Talǵardan kóshýdi josparlap júr.
“Bizdi tek talǵarlyqtar qana emes, basqa óńirdiń turǵyndary men basqa eldiń azamattary da qoldap jatyr. Men bárine alǵys aitamyn. Negizi Talǵardan ketkim keledi. Sebebi Sherzattan basqa balalarym bar. Biraq qai qalaǵa, qai aimaqqa kóshetinimdi aitqym kelmeidi”, — dedi ol.
Al kúdiktilerge qatysty tergeý jalǵasýda. Marqumnyń qorǵaýshylary Saida Táýekelova men Karina Kosherbaevanyń aitýynsha, qylmystyq is birneshe bap boiynsha qaralyp jatyr. Jaqynda tergeý aiaqtalyp, is sotqa jiberiledi.
“Áli de tergeý júrgizilip jatyr. Meniń topshylaýymsha, jaqyn arada aiaqtalýy múmkin. Zań boiynsha belgili bir merzimi bar. Atalǵan baptar boiynsha egjei-tegjeili jumys júrgizilip jatyr. Eki aptadan keiin tergeý aiaqtalady dep oilaimyz. Sodan soń ol prokýratýraǵa joldanyp, is qaralady. Sóitip qańtar aiynyń ortasynda sottyń qai ýaqytta ótetini belgili bolady. Qazir Sherzattyń baýyrlarymen jáne ata-anasymen eki psiholog jumys istep jatyr. Qazir ata-anasyna ońai emes. Jaqynda ǵana qyrqyn ótkizdi”, — deidi Saida Táýekelova.
Aitýynsha, marqumnyń otbasyna áli baspana berilmegen.
“Úi órtengennen keiin aýdan ákimi men oblys ákimi kelip, úi tabystalatynyn aitty. Ókinishke qarai, búgingi kúnge deiin qandai da bir úi beriletini týraly eshqandai aqparat joq. Marqumnyń áke-sheshesi áli kúnge deiin ata-anasynyń úiinde turyp jatyr. Al bizge áli eshteńe anyq emes”, — deidi qorǵaýshy.
Al Karina Kosherbaeva tergeýdiń keńeitilgen túrde qaralyp jatqanyn jetkizdi.
“Basynda qylmystyq is tek 7 adamǵa qozǵaldy. Qazirgi tańda 11 adam ustaldy. Sonymen qatar kýáger retinde qaralyp jatqan adamdar da bar. Qazirgi ýaqytta birneshe bap boiynsha is qaralyp jatyr”, - dep atap ótti qorǵaýshy.
Eske salaiyq, buǵan deiin Talǵarda jappai tóbeles bolyp, saldarynan 16 jastaǵy jasóspirim kóz jumdy. Janjal jigittiń otbasy jalǵa alatyn dúkennen bastalǵan. Týystarynyń aitýynsha, saýda núktesine kelgen satyp alýshy syra alyp, aqshasyn tóleýden bas tartqan. Osy jaǵdaidan keiin tóbeles bastalǵan.
Kámeletke tolmaǵan balany óltirý faktisi boiynsha Almaty oblysynyń politsiia departamenti qylmystyq is qozǵady.
Qazirgi tańda kináli dep tanylǵan 11 adam ustalyp, ýaqytsha ustaý izoliatoryna qamaýǵa alynǵan.
Sonymen qatar, Almaty oblystyq politsiia departamenti bastyǵynyń mindetin atqarýshy Shalqarov tóbelesten keiin qansha qarý tárkilengenin aitty.
Odan keiin Sherzattyń úiine kúzet qoiyldy.
Kóp uzamai marqum Sherzattyń úii órtendi.
