Ekonomikalyq sarapshy Ǵalymjan Aitqazin kesheli beri burq-sarqqa kóshken valiýta naryǵyna qatysty boljamymen bólisti. Ol teńge baǵamyn qoldaý úshin keshe Ulttyq bank valiýtalyq interventsiia júrgizgenin aitady, dep habarlaidy Dalanews.kz.
"Keshe teńgege shaqqanda AQSh dollarynyń aiyrbas baǵamy (USDKZT) Ýkrainada soǵys bastalǵannan beri alǵash ret (2022 jyldyń naýryzynan bastap) 500-den asty. Bul keshe Resei Federatsiiasynyń Ortalyq banki resmi túrde rýbldi dollarǵa shaqqandaǵy baǵamyn 108 deńgeiinde belgilep jatqan jaǵdaida bolǵany. Eń alańdatarlyq jaǵdai, keshegi teńgeniń rýblge shaqqandaǵy baǵamy, ol 2023 jylǵy tamyzdan bastap alǵash ret 4,3-4,4-ke deiin nyǵaidy, al buǵan deiin kross-baǵam 5-ten kóp tómendemeitin. Bul, shyn máninde, naryqqa qatysýshylardyń valiýta baǵamdaryna qatysty konsensýsyn tanytady", dep jazady Tengenomika arnasynyń avtory Ǵalymjan Aitqazin.
Ol naryqqa qatysýshylardyń aldyńǵy tájiribesi men logikasyna súiensek, teńgeniń rýblge shaqqandaǵy baǵamynyń kúrt nyǵaiýy mynandai jaǵdailarda boljanatynyn paiymdaidy:
"Eger naryqqa qatysýshylar teńgeniń AQSh dollaryna shaqqandaǵy baǵamy álsiremeýi tiis dep eseptese, kross-baǵam kúrt nyǵaiady, Resei rýbli de AQSh dollaryna shaqqanda qatty álsiremeidi. Eger Qazaqstan Ulttyq banki valiýtalyq saýda-sattyqtyń retteýshisi jáne qatysýshysy retinde sheteldik valiýtalar usynysyn arttyrsa (iaǵni, valiýtalyq interventsiialar júrgizse), onda rýbl baǵamy AQSh dollaryna shaqqanda kúrt quldyrai jóneledi (týra keshegidei). Aitqandai, keshegi saýda-sattyq qorytyndysy boiynsha KASE birjasynyń valiýta sektsiiasynda pandemiia bastalǵannan beri USD/KZT juby boiynsha 455,4 mln dollar kólemindegi saýda-sattyqtyń rekordtyq kórsetkishi tirkeldi, jalpy ol "anomaldy" bolyp tabylady. Bul kólem aldyńǵy kúnniń kórsetkishinen 2,2 esege artyq".
Onyń aitýynsha, osy jaǵynan alǵanda, biz naryq qatysýshylarynyń Resei valiýtasymen salystyrǵanda AQSh dollaryna shaqqanda teńge berik bolady dep úmittenedi, muny kross-baǵamnyń tanytqan minezinen baiqai da alamyz.
"Sondyqtan, Qazaqstan Ulttyq banki keshe teńgeni qoldaý úshin valiýtalyq interventsiialar júrgizýi múmkin dep boljaimyz, buǵan KASE-degi saýda-sattyqtyń rekordtyq kólemi dálel bola alady. Aitpaqshy, biz bul arada teńge baǵamyna qosymsha kvazimemlekettik sektordyń valiýtalyq túsiminiń 50%-yn teńgege ainaldyrýdy mindetteý talabynyń qoldaý bolǵanyn joqqa shyǵara almaimyz. Al búgin qor birjasyndaǵy kelissózder barysynda 1 AQSh dollary 503-ten 508-ge deiin bardy. Bul ulttyq valiýtaǵa qysym jasalyp jatqanynyń, onyń áli jalǵasýda ekenin aiǵaǵy bola alady", dep sózin qorytady ol.
Aita ketsek, 27 qarashada Resei rýbline shaqqanda 1 AQSh dolarynyń baǵamy 100-den 120 rýblge bir-aq kóterildi. Al bul kezde teńgege shaqqandaǵy dollar qunynda qatty ózgeris bolmady. Al oǵan ne sebep ekenin joǵaryda sarapshymyz jaqsy túsindirip otyr. Teńge baǵamyn qoldaýdy Ulttyq bank ary qarai jalǵastyrady ma? Kúndizgi sessiiadaǵy jaǵdai, Ulttyq bank bul raiynan ońaishylyqpen qaitpaitynyn tanytady. Aqsha aiyrbas oryndarynda dollar qatty qymbattaǵanymen, resmi baǵam áli ózgergen joq. Búgin, 28 qarashada Ulttyq banktiń ulttyq valiýtaǵa shaqqandaǵy 1 AQSh dollaryna belgilegen resmi baǵamy: 499,51 teńge!
