ەكونوميكالىق ساراپشى عالىمجان ايتقازين كەشەلى بەرى بۇرق-سارققا كوشكەن ۆاليۋتا نارىعىنا قاتىستى بولجامىمەن ءبولىستى. ول تەڭگە باعامىن قولداۋ ءۇشىن كەشە ۇلتتىق بانك ۆاليۋتالىق ينتەرۆەنسيا جۇرگىزگەنىن ايتادى، دەپ حابارلايدى Dalanews.kz.
"كەشە تەڭگەگە شاققاندا اقش دوللارىنىڭ ايىرباس باعامى (USDKZT) ۋكراينادا سوعىس باستالعاننان بەرى العاش رەت (2022 جىلدىڭ ناۋرىزىنان باستاپ) 500-دەن استى. بۇل كەشە رەسەي فەدەراسياسىنىڭ ورتالىق بانكى رەسمي تۇردە ءرۋبلدى دوللارعا شاققانداعى باعامىن 108 دەڭگەيىندە بەلگىلەپ جاتقان جاعدايدا بولعانى. ەڭ الاڭداتارلىق جاعداي، كەشەگى تەڭگەنىڭ رۋبلگە شاققانداعى باعامى، ول 2023 جىلعى تامىزدان باستاپ العاش رەت 4،3-4،4-كە دەيىن نىعايدى، ال بۇعان دەيىن كروسس-باعام 5-تەن كوپ تومەندەمەيتىن. بۇل، شىن مانىندە، نارىققا قاتىسۋشىلاردىڭ ۆاليۋتا باعامدارىنا قاتىستى كونسەنسۋسىن تانىتادى"، دەپ جازادى Tengenomika ارناسىنىڭ اۆتورى عالىمجان ايتقازين.
ول نارىققا قاتىسۋشىلاردىڭ الدىڭعى تاجىريبەسى مەن لوگيكاسىنا سۇيەنسەك، تەڭگەنىڭ رۋبلگە شاققانداعى باعامىنىڭ كۇرت نىعايۋى مىنانداي جاعدايلاردا بولجاناتىنىن پايىمدايدى:
"ەگەر نارىققا قاتىسۋشىلار تەڭگەنىڭ اقش دوللارىنا شاققانداعى باعامى السىرەمەۋى ءتيىس دەپ ەسەپتەسە، كروسس-باعام كۇرت نىعايادى، رەسەي ءرۋبلى دە اقش دوللارىنا شاققاندا قاتتى السىرەمەيدى. ەگەر قازاقستان ۇلتتىق بانكى ۆاليۋتالىق ساۋدا-ساتتىقتىڭ رەتتەۋشىسى جانە قاتىسۋشىسى رەتىندە شەتەلدىك ۆاليۋتالار ۇسىنىسىن ارتتىرسا (ياعني، ۆاليۋتالىق ينتەرۆەنسيالار جۇرگىزسە)، وندا رۋبل باعامى اقش دوللارىنا شاققاندا كۇرت قۇلدىراي جونەلەدى (تۋرا كەشەگىدەي). ايتقانداي، كەشەگى ساۋدا-ساتتىق قورىتىندىسى بويىنشا KASE بيرجاسىنىڭ ۆاليۋتا سەكسياسىندا پاندەميا باستالعاننان بەرى USD/KZT جۇبى بويىنشا 455،4 ملن دوللار كولەمىندەگى ساۋدا-ساتتىقتىڭ رەكوردتىق كورسەتكىشى تىركەلدى، جالپى ول "انومالدى" بولىپ تابىلادى. بۇل كولەم الدىڭعى كۇننىڭ كورسەتكىشىنەن 2،2 ەسەگە ارتىق".
ونىڭ ايتۋىنشا، وسى جاعىنان العاندا، ءبىز نارىق قاتىسۋشىلارىنىڭ رەسەي ۆاليۋتاسىمەن سالىستىرعاندا اقش دوللارىنا شاققاندا تەڭگە بەرىك بولادى دەپ ۇمىتتەنەدى، مۇنى كروسس-باعامنىڭ تانىتقان مىنەزىنەن بايقاي دا الامىز.
"سوندىقتان، قازاقستان ۇلتتىق بانكى كەشە تەڭگەنى قولداۋ ءۇشىن ۆاليۋتالىق ينتەرۆەنسيالار جۇرگىزۋى مۇمكىن دەپ بولجايمىز، بۇعان KASE-دەگى ساۋدا-ساتتىقتىڭ رەكوردتىق كولەمى دالەل بولا الادى. ايتپاقشى، ءبىز بۇل ارادا تەڭگە باعامىنا قوسىمشا كۆازيمەملەكەتتىك سەكتوردىڭ ۆاليۋتالىق ءتۇسىمىنىڭ 50%-ىن تەڭگەگە اينالدىرۋدى مىندەتتەۋ تالابىنىڭ قولداۋ بولعانىن جوققا شىعارا المايمىز. ال بۇگىن قور بيرجاسىنداعى كەلىسسوزدەر بارىسىندا 1 اقش دوللارى 503-تەن 508-گە دەيىن باردى. بۇل ۇلتتىق ۆاليۋتاعا قىسىم جاسالىپ جاتقانىنىڭ، ونىڭ ءالى جالعاسۋدا ەكەنىن ايعاعى بولا الادى"، دەپ ءسوزىن قورىتادى ول.
ايتا كەتسەك، 27 قاراشادا رەسەي رۋبلىنە شاققاندا 1 اقش دولارىنىڭ باعامى 100-دەن 120 رۋبلگە ءبىر-اق كوتەرىلدى. ال بۇل كەزدە تەڭگەگە شاققانداعى دوللار قۇنىندا قاتتى وزگەرىس بولمادى. ال وعان نە سەبەپ ەكەنىن جوعارىدا ساراپشىمىز جاقسى ءتۇسىندىرىپ وتىر. تەڭگە باعامىن قولداۋدى ۇلتتىق بانك ارى قاراي جالعاستىرادى ما؟ كۇندىزگى سەسسياداعى جاعداي، ۇلتتىق بانك بۇل رايىنان وڭايشىلىقپەن قايتپايتىنىن تانىتادى. اقشا ايىرباس ورىندارىندا دوللار قاتتى قىمباتتاعانىمەن، رەسمي باعام ءالى وزگەرگەن جوق. بۇگىن، 28 قاراشادا ۇلتتىق بانكتىڭ ۇلتتىق ۆاليۋتاعا شاققانداعى 1 اقش دوللارىنا بەلگىلەگەن رەسمي باعامى: 499،51 تەڭگە!
