Qalyptasqan úrdiske saı jańa oqý jyly qarsańynda ótkizilgen keńes jumysyna oblys ákimi Amandyq Batalov, Qazaqstan Respýblıkasynyń Bilim jáne ǵylym mınıstrliginiń Ǵylym komıtetiniń tóraǵasy Erkin Sadyqov jáne oblystyń barlyq aýdan-qalasynan bilim berý salasynyń qyzmetkerleri qatysty.
Oblys ákiminiń orynbasary Jaqsylyq Omar konferensıany resmı túrde ashyp, júrgizip otyrdy.
Negizgi baıandamany oqyǵan Almaty oblystyq bilim basqarmasynyń basshysy Lázzat Bazarqulova,konferensıaǵa qatysýshylarǵa ótken oqý jylynyń, UBT-nyń qorytyndysyn baıandap, jańa oqý jylynda júkteletin negizgi máselelerge toqtaldy.
Bilim basqarmasy basshysynyń sózine súıener bolsaq, jańa oqý jylyna qoıylar talaptardyń negizgisi - bilim deńgeıin kóterý, pedagogıkalyq ujymnyń arasyndaǵy tártip pen uıymshyldyqty arttyrý, árbir ustaz ben mektep ákimshiliginiń jumys nátıjeliligine qoıylar talapty kúsheıtý bolyp tabylady. Baıandamada Memleket basshysy men QR Bilim jáne ǵylym mınıstrliginiń jańadan engizgen talaptaryn ustazdar qaýymynyń buljytpaı oryndaýy qajettigijaıynda aıtyldy. Atap aıtqanda, úsh tuǵyrly til saıasaty, «Rýhanı jańǵyrý» baǵdarlamasyn júzege asyrý, pedagogtardyń biliktiligin arttyrý jáne ózge de mańyzdy tapsyrmalar júkteldi.
Ótken jyldyń jetistikterine toqtalǵan oblystyń bas ustazy problemalyq máselelerge de kóńil aýdardy. Olardyń ishinde UBT-nyń nátıjesikóńil kónshitpedi. L.Bazarqulova osy iske jaýapty tulǵalarǵa, sonyń ishinde oblystyq bilim basqarmasyna da kemshilikterdi aldaǵy oqý jylynda qaıtalamaýdyń qam-qareketin oılastyrýǵa búginnen bastap kirisýdi talap etti.
Konferenesıa barysynda sóz sóılegen Qazaqstan Respýblıkasynyń Bilim jáne ǵylym mınıstrliginiń Ǵylym komıtetiniń tóraǵasy Erkin Sadyqov, bilim men ǵylymdy damytýdyń jańa memlekettik baǵdarlamasy men bilimdi damytýdyń jańartylǵan mazmuny týraly tolyqtaı túsindirip berdi.
Jaryssózge qatysqan ustazdar kún tártibinde búgingi kúnniń ózekti máselelerine toqtaldy. Olardyń ishinde pedagogtardyń básekege qabilettiligi, jańasha bilim berý mazmuny, patrıottyq tárbıe, dýaldy oqytý, tehnıkalyq jáne kásibı bilim berýde eńbek naryǵynyń suranysyna saı keletin bilikti kadrlar daıyndaý máseleleri aıtyldy.
Pedagogtardyń tamyz konferensıasyn óńir basshysy Amandyq Batalov qorytyndylady.
Ustazdar qaýymyn jańa oqý jylynyń bastalýymen quttyqtap, jumystaryna tabys tileı kele, jańa oqý jylyna qoıylǵan tapsyrmalardyń basym baǵyttaryn aıqyndap ótti.
- Qurmetti jıynǵa qatysýshylar, qurmetti ustazdar! Keler oqý jylynda pedagogtarymyzǵa úlken mindetter artylady. Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasynda usynǵan qoǵamdyq sanany jańǵyrtý josparyn iske asyrý boıynsha óskeleń urpaqpen túsindirme jumystaryn birlesip júrgizýimiz qajet.
Memleket basshysy Nursultan Ábishuly Nazarbaevtyń qoldaýynyń arqasynda bilim berýdiń qazaqstandyq úlgisi damýdyń jańa satysyna kóterilýde, belsendi túrde zamanaýı ınfraqurylym qalyptasýda. Sol sebepti, kúsh-jigerimizdi bir arnaǵa buryp, barlyq baǵyttar boıynsha birlese jumys jasaýmyz qajet. Bizdiń maqsatymyz ortaq, ol elimizdiń óskeleń urpaǵyna sapaly bilim berý, ult jandy, elimizdiń maqtan tutar azamattaryn tárbıelep shyǵý, - dedi A. Batalov.
Óz sózin jalǵasytar kele óńir basshysy bilim salasynyń aqsap turǵan kún tártibindegi máselelerine erekshe kóńil bólý qajettigin eskertti. Solardyń ishinde UBT-nyń nátıjesi, balalardy qosymsha bilimmen qamtýdyń az úlesi, mektep dırektorlarynyń atymen baılanysty oryn alǵan keleńsiz oqıǵalar, kadrlardy jumysqa qabyldaý kezindegi óz isine jaýapsyzdyq máseleleri bar. Sondaı-aq oblys ákimi tárbıeleý isiniń bosańsyp ketýiniń saldarynan ýaqytynan erte júkti bolý, jasóspirimder arasyndaǵy qylmystyń artý derekteriniń kóbeıip bara jatqandyǵyna da nazar aýdardy.
Osy atalǵan máselelerge baılanysty Amandyq Batalov aýdan-qala ákimderine, oblystyq bilim basqarmasynyń basshysyna jumystaryn qaıta qarap, aıtylǵan árbir baǵyt boıynsha tıisti shara qoldanýdy júktedi. Sonymen qatar oblys ákimi aýdan-qala ákimderine fızıka pániniń muǵalimderin oqýshylarymen birge «Astana EKSPO-2017» halyqaralyq mamandandyrylǵan kórmesine baryp qaıtýyn, olardy jatyn orynmen jáne tamaqtanýyn qamtamasyz etýdi tapsyrdy.
Óńir basshysy úsh tilde oqytýdy jetildirý, «Rýhanı jańǵyrý» baǵdarlamasyn júzege asyrý, mektepke deıingi, tehnıkalyq jáne kásiptik bilim berý máselesimen qatar ata-ana qamqorlyǵynsyz qalǵan balalardy baspanamen qamtý máselesi erekshe baqylaýda turǵandyǵyn eskertti.
Osydan keıin óziniń kásibı sheberligin shyńdaýǵa úlken kóńil bólip, ustazdyq etýdiń jańa ádisterin turaqty engizip júrgen birneshe ustazdardyń esimin atap, ótken jyldyń qorytyndysy boıynsha úzdik dep tanylǵan ustazdardy marpattaý rásimin ótkizdi. Olardyń ishinde «Qazaqstan Respýblıkasynyń bilim berý isiniń qurmetti qyzmetkeri» jáne «Y.Altynsarın» atyndaǵy tósbelgilermen marapattalǵandary da boldy. Sondaı-aq ustazdarǵa oblys ákiminiń Qurmet gramotalary men Alǵys hattary berildi.
Esterińizge salar bolsaq, İ.Jansúgirov atyndaǵy Mádenıet saraıynyń foıesinde oblystyń bilim berý mekemeleriniń atqaryp jatqan jumystarynyń basym baǵyttaryn kórsetetin kórme uıymdastyryldy.
Aǵymdaǵy jyly Almaty oblysynyń bilim berý salasynyń búdjeti 153,7 mlrd. teńgeni qurady. Onyń ishinde bilim berý nysandarynyń qurylysyna 27 mlrd. teńgeden astam qarajat qarastyrylǵan. Óńirde 48 bilim berý nysanynyń qurylysy men qalpyna keltirý jumystary júrgizilýde. Jyl sońyna deıin 44 mekteptiń 35-i paıdalanýǵa beriledi. Bilim kúninde 24 jańa mektep óziniń alǵashqy oqýshylaryna esigin ashpaq. Osy mektepterdiń 23-i úsh aýysymda oqytý máselesin sheshetin bolady. Al 2018 jyly taǵy 10 mektep salý arqyly úsh aýysymda oqytý máselesi tolyqtaı sheshilmek. Sonymen qatar, bıylǵy jyly 24 mektepte kúrdeli jóndeý jumystary júrgizilgendigin atap ótken jón.
Almaty oblysy ákiminiń baspasóz qyzmeti
