Jeltoqsan oqiǵasynda qansha adamnyń qaza tapqany áli kúnge deiin naqty emes. Resmi derekterde qaitys bolǵan tórt adamnyń ǵana aty aitylsa, beiresmi derekkózder marqum bolǵandar sanynyń budan áldeqaida kóp ekenin málimdep keledi. Sondai-aq, osy kóteriliske qatysqan 99 jas azamat sottalyp, 264 stýdent oqýdan shyǵarylǵan.
Jalpy, Almatydaǵy Jeltoqsan kóterilisin postkeńestik elderdiń sarapshylary KSRO-ny qulatýǵa birden-bir túrtki bolǵan oqiǵa ekenin aitady. Ózge elder moiyndaǵanymen, Qazaqstan biligi atalǵan oqiǵaǵa áli naqty baǵasyn bergen emes.
Búkil Qazaqstan boiynsha 1986 jyly jeltoqsan kóterilisine qatysqan adamdardyń tizimin túzý de qolǵa alynyp kele jatqan sekildi.
Kezinde osy kóteriliske qatysqany úshin qýdalanyp, jazalanbaý úshin jeltoqsandyqtar alǵan dene jaraqatyn, kórgen azabyn jasyrýǵa májbúr boldy. Sondai jastardyń qatarynda bizdiń áriptesimiz Ózenbekqyzy Perýza Asylbek (Asilbekova). Ol kúresten taiynbai, oqiǵanyń ortasynda júrgenin óziniń azamattyq boryshy sanaǵandyqtan bolar, sol bir qandy oqiǵaǵa qatysqanyn dáleldeýge tyrysqan da emes.
Degenmen ýaqyt óte resmi qujattar arqyly onyń jeltoqsanshy ekeni anyqtalyp, jýyrda ótken elimizdiń bolashaǵy úshin kúresken jeltoqsanshylardy marapattaityn jinalysqa qatysyp, tiisti mártebesin alyp qaitty.
Búgingi kúnniń batyry atanǵan Perýza Ózenbekqyzy 1964 jyldyń qańtar aiynda Ońtústik Qazaqstan oblysy, Keles aýdany, Kommýnar aýylyndaǵy ustazdar otbasynda dúniege kelgen.
1981 jyly orta mektepti, 1987 jyly S.M. Kirov atyndaǵy QazMÝ – dy (ál-Farabi atyndaǵy QazUÝ) bitirgen. Eńbek jolyn «Leninshil jas» gazetiniń korrektory bolyp bastaǵan jas jýrnalist 1994 jyldan bastap «Bailanys» gazeti redaktsiiasynyń shyǵarmashylyq qyzmet bóliminiń meńgerýshi qyzmetine joǵarylatylady. 1997-2002 j. j. aralyǵynda QR Kólik jáne kommýnikatsiia ministrligine qarasty «Vash transkýrer» gazeti bas redaktorynyń orynbasary qyzmetin atqarady.
2009 jyldan bastap «Bóbek» Ulttyq ǵylymi-praktikalyq, bilim berý jáne saýyqtyrý ortalyǵy» respýblikalyq memlekettik qazynalyq kásipornynda, 2011 jyldan kúni búginge deiin «Almaty ustazy/Ýchitel Almaty» respýblikalyq aqparattyq-ádistemelik jýrnalynyń jaýapty redaktory qyzmetinde qalamyn ushtap keledi.
2012 jyldan bastap «Órleý» Biliktilikti Arttyrý Ulttyq ortalyǵy» aktsionerlik qoǵamynyń filialy Almaty qalasy boiynsha pedagogikalyq qyzmetkerlerdiń biliktiligin arttyrý institýtynyń Qoǵammen bailanys jáne baspa qyzmeti bóliminiń bastyǵy qyzmetinde bolǵan ýaqyt aralyǵyndaǵy P. Ó. Asylbektiń baǵa jetpes úlesin atap ótý mańyzdy. «Órleý» BAUO» AQ qyzmetin respýblikalyq teledidarda, respýblikalyq BAQ-ta, áleýmettik jelilerde tanymal etip keledi. Pandemiia jaǵdaiynda qashyqtyqtan bilim berýdi qoldaý boiynsha «Órleý» BAUO» AQ filialy Almaty qalasy boiynsha PQ BAI trenerleriniń sapaly qyzmetin qamtamasyz etýde belsendiligimen erekshelendi.
2014 jyly Pedagogika jáne psihologiia mamandyǵy boiynsha «Túrkilik muralardaǵy otbasy tárbieniń qalyptasýy men damýy» taqyrybynda pedagogika ǵylymdarynyń magistri akademiialyq dárejesin qorǵady.
Asylbek P. Ó. – «Máńgilik muralardaǵy otbasy tárbiesi», «Til – tanym jáne patriottyq tárbie quraldary», «Qazaq halqynda otbasy tárbiesiniń qalyptasýy» atty ǵylymi maqalalardyń avtory.
Perýza Ózenbekqyzy joǵary kásibi jýrnalist, bilikti basshy jáne adal qyzmetker retinde de tanymal. 2021 j. 31-mamyrda saiasi qýǵyn-súrgin jáne asharshylyq qurbandaryn eske alý kúni «Aq jol» Qazaqstan demokratiialyq partiiasynyń Qazaqstan Respýblikasynyń 100 jyldyǵyna orai Alash ulttyq ideiasyn nasihattaýǵa, demokratiia qaǵidattaryn qorǵaýǵa qosqan úlesi úshin medalin keýdesine taqty. Áriptesimiz erekshe eńbegi úshin birneshe ret «Órleý» BAUO» AQ jáne Almaty qalasy bilim basqarmasynyń Qurmet gramotalarymen jáne birneshe dúrkin Alǵys hattarmen marapattalǵan. Qazaqtyń kúresker qyzy, áriptesimiz – Perýzanyń alar asýy, shyǵar shyńy biiktei bersin.
Iá, jeltoqsan jańǵyryǵy áli talai taǵdyrly zamandastarymyzdy jariia eteri sózsiz. Tarih tarazysyna túsken bul oqiǵa jái oqiǵa emes, ult-azattyq kúres demeske amalyń bar ma, aǵaiyn?!
Sh. Biten
