Monshanyń adam densaýlyǵyna paidasyn burynnan bilemiz. Býly bólmege kirgen saiyn tán de, jan da tazarady. Al eger monshaǵa aptasyna bir ret turaqty baryp tursańyz, onyń áseri birneshe ese artady. Bul – densaýlyqty nyǵaitýdyń, sharshaýdy basýdyń jáne aǵzany jasartýdyń tabiǵi joly, dep habarlaidy Dalanews.kz.
Mine, apta saiyn monshaǵa barýǵa 5 mańyzdy sebep:
1. Aǵzany tazartý
Monshada qatty terlegen kezde teri arqyly aǵzadaǵy ýly zattar men toksinder shyǵarylady. Bul – deneni tabiǵi jolmen tazartýdyń eń tiimdi ádisi. Aptasyna bir ret monshaǵa barý aǵzany shlaktardan aryltyp, jalpy jaǵdaidy jaqsartady.
2. Immýnitetti kúsheitedi
Bý men ystyqtyń áserinen qan ainalymy jaqsaryp, aǵzada aq qan túiirshikteri (leikotsitter) belsendi jumys istei bastaidy. Nátijesinde adam túrli virýstar men bakteriialarǵa qarsy tura alady. Monshaǵa jii barǵan adam sirek aýyrady.
3. Júrek pen qantamyr júiesin qorǵaidy
Monshada ystyq bý men sýyq sýdyń almasýy – tamyrlar úshin tamasha jattyǵý. Bul qan qysymynyń turaqtanýyna, gipertoniianyń aldyn alýǵa jáne júrek jumysyn jaqsartýǵa kómektesedi.
4. Jasartýshy áseri bar
Monshada aǵzanyń jasýshalary jańaryp, teri tesikteri ashylyp, qan ainalymy kúsheiedi. Osylaisha teri serpindi, taza jáne jas kórinedi. Monsha – sulýlyq pen jastyqtyń tabiǵi syry.
5. Júike júiesin tynyshtandyrady
Monsha – kúizelisten arylýdyń eń jaqsy tásilderiniń biri. Bý bólmesinde otyryp, bulshyqetter bosańsidy, júike júiesi qalpyna keledi. Efir mailaryn qossańyz, áseri tipti kúsheiedi – uiqy jaqsaryp, kóńil-kúi kóteriledi.
Alaida monshaǵa barý barlyǵyna birdei paidaly bola bermeidi. Júrek-qan tamyr aýrýlary, tynys alý joldarynyń sozylmaly syrqattary, joǵary qan qysymy, teri aýrýlary nemese qant diabeti bar adamdarǵa monsha kei jaǵdaida ziian tigizýi múmkin. Sondyqtan dárigermen keńesken jón.
