مونشانىڭ ادام دەنساۋلىعىنا پايداسىن بۇرىننان بىلەمىز. بۋلى بولمەگە كىرگەن سايىن ءتان دە، جان دا تازارادى. ال ەگەر مونشاعا اپتاسىنا ءبىر رەت تۇراقتى بارىپ تۇرساڭىز، ونىڭ اسەرى بىرنەشە ەسە ارتادى. بۇل – دەنساۋلىقتى نىعايتۋدىڭ، شارشاۋدى باسۋدىڭ جانە اعزانى جاسارتۋدىڭ تابيعي جولى، دەپ حابارلايدى Dalanews.kz.

مىنە، اپتا سايىن مونشاعا بارۋعا 5 ماڭىزدى سەبەپ:

1. اعزانى تازارتۋ
مونشادا قاتتى تەرلەگەن كەزدە تەرى ارقىلى اعزاداعى ۋلى زاتتار مەن توكسيندەر شىعارىلادى. بۇل – دەنەنى تابيعي جولمەن تازارتۋدىڭ ەڭ ءتيىمدى ءادىسى. اپتاسىنا ءبىر رەت مونشاعا بارۋ اعزانى شلاكتاردان ارىلتىپ، جالپى جاعدايدى جاقسارتادى.

2. يممۋنيتەتتى كۇشەيتەدى
بۋ مەن ىستىقتىڭ اسەرىنەن قان اينالىمى جاقسارىپ، اعزادا اق قان تۇيىرشىكتەرى (لەيكوسيتتەر) بەلسەندى جۇمىس ىستەي باستايدى. ناتيجەسىندە ادام ءتۇرلى ۆيرۋستار مەن باكتەريالارعا قارسى تۇرا الادى. مونشاعا ءجيى بارعان ادام سيرەك اۋىرادى.

3. جۇرەك پەن قانتامىر جۇيەسىن قورعايدى
مونشادا ىستىق بۋ مەن سۋىق سۋدىڭ الماسۋى – تامىرلار ءۇشىن تاماشا جاتتىعۋ. بۇل قان قىسىمىنىڭ تۇراقتانۋىنا، گيپەرتونيانىڭ الدىن الۋعا جانە جۇرەك جۇمىسىن جاقسارتۋعا كومەكتەسەدى.

4. جاسارتۋشى اسەرى بار
مونشادا اعزانىڭ جاسۋشالارى جاڭارىپ، تەرى تەسىكتەرى اشىلىپ، قان اينالىمى كۇشەيەدى. وسىلايشا تەرى سەرپىندى، تازا جانە جاس كورىنەدى. مونشا – سۇلۋلىق پەن جاستىقتىڭ تابيعي سىرى.

5. جۇيكە جۇيەسىن تىنىشتاندىرادى
مونشا – كۇيزەلىستەن ارىلۋدىڭ ەڭ جاقسى تاسىلدەرىنىڭ ءبىرى. بۋ بولمەسىندە وتىرىپ، بۇلشىقەتتەر بوساڭسيدى، جۇيكە جۇيەسى قالپىنا كەلەدى. ەفير مايلارىن قوسساڭىز، اسەرى ءتىپتى كۇشەيەدى – ۇيقى جاقسارىپ، كوڭىل-كۇي كوتەرىلەدى.

الايدا مونشاعا بارۋ بارلىعىنا بىردەي پايدالى بولا بەرمەيدى. جۇرەك-قان تامىر اۋرۋلارى، تىنىس الۋ جولدارىنىڭ سوزىلمالى سىرقاتتارى، جوعارى قان قىسىمى، تەرى اۋرۋلارى نەمەسە قانت ديابەتى بار ادامدارعا مونشا كەي جاعدايدا زيان تيگىزۋى مۇمكىن. سوندىقتان دارىگەرمەن كەڭەسكەن ءجون.