"Eski Qazaqstan" dáýirinde biliktiń biik satysynda júrgen sheneýnikterdiń balalary qazir "jańa Qazaqstannyń" saiasi sahnasynda kózge túsip júr. Yqpaldy ortada ósken bul býyn ata jolyn qýyp, búginde el basqarý isinde belsendilik tanytýda.
Buǵan deiin biz bedeldi áýletterdiń birqataryna toqtalǵanbyz. Bul joly Dalanews.kz nazarlaryńyzǵa bilikten qol úzbegen taǵy birneshe ákeli-balaly sheneýnikterdi usynady.
Eleýsizovter áýleti
Timýr Eleýsizov 2023 jyldyń 30 naýryzynan bastap Almaty qalasy máslihatynyń depýtaty qyzmetin atqaryp keledi. Sonymen qatar 39 jastaǵy sheneýnik Almaty qalasy Alataý aýdany ákiminiń ekologiia máseleleri jónindegi keńesshisi.
Onyń ákesi Mels Eleýsizov esimi “Eski Qazaqstan” kezeńinde-aq elge keńinen tanylǵan saiasatker ári ekolog. 2005 jáne 2011 jyldary Qazaqstan Respýblikasy Prezidenti sailaýyna kandidat bolǵan. Búginde ol "Tabiǵat" ekologiialyq odaǵynyń jetekshisi qyzmetin atqarady.
Mádievter áýleti
Qazaqstanda jańa býyn sheneýnikterdiń arasynan Jaslan Mádievtiń esimi jii atalady. 42 jastaǵy sheneýnik búginde Premer-ministrdiń orynbasary ári Jasandy intellekt jáne tsifrlyq damý ministri qyzmetterin atqarady.
Tsifrlandyrý salasy Jaslan Mádiev úshin jańa baǵyt emes. Ol buǵan deiin de Tsifrlyq damý, innovatsiialar jáne aeroǵarysh ónerkásibi ministrliginde (MTsRIAP) túrli laýazymda jumys istegen.
Mádievtiń kásibi joly negizinen qarjy salasymen bailanysty. Ol “Samuryq-Qazyna” qorynda, Damý bankinde jáne Ulttyq bankte qyzmet atqarǵan, sondai-aq Ulttyq ekonomika vitse-ministri bolǵan.
Áýlettiń ózge músheleri de memlekettik qyzmette tóbe kórsetken. Ákesi Hasen Mádiev kezinde “Qazaqtelekom” ulttyq kompaniiasynda qarjy salasyna jaýapty qyzmette bolǵan (2008 jylǵa deiin). Inisi Oljas Mádiev 2020 jyly Almaty qalasy Medeý aýdany ákimdigi apparatynyń qyzmetkeri retinde tirkelgen.
Jaslan Mádievtiń jubaiy - Májilis depýtaty Dúisenbai Turǵanovtyń qyzy Maira Turǵanova.
Nurpeiisovter áýleti
Qazaqstannyń joǵary bilik qurylymynda jańa esimderdiń qataryn Asat Nurpeiisov tolyqtyrady. Ol 2024 jyldyń 7 aqpanynda Prezident Is basqarýshysy qyzmetine taǵaiyndaldy. Bul laýazym eldiń basqarý júiesinde airyqsha mánge ie, sebebi Prezident ákimshiliginiń materialdyq-tehnikalyq jáne uiymdastyrýshylyq jumystaryn úilestiredi.
Asat Nurpeiisov buǵan deiin, 2023 jyldyń qańtarynan bastap, Prezident Is basqarýshynyń orynbasary qyzmetin atqarǵan.
Aita ketsek, onyń ákesi — Bolat Nurpeiisov te dál osy qurylymda uzaq jyldar boiy eńbek etken tulǵa. Ol 1996 jyldan 2006 jylǵa deiin Prezident Is basqarýshysynyń orynbasary qyzmetin atqarǵan. Keiin jeke sektorǵa aýysqanymen, memlekettik basqarý salasynan qol úzbedi.
Nyǵmatýllinder áýleti
Nyǵmatýllinder áýleti saiasi minberde uzaq jyldar boiy belsendi ról atqaryp keldi.
Máselen, Malika Nyǵmatýllina 2021 jyldyń jeltoqsanynan beri “Green Mine” kompaniiasynyń basqarma tóraiymy qyzmetin atqarady. Kompaniia taý-ken óndirisiniń tehnogendik mineraldyq qaldyqtaryn qaita óńdeý salasyna mamandanǵan.
Malika Erlanqyzy eńbek jolyn 2002 jyly Qazaqstan Respýblikasy Qarjy ministrliginde jetekshi maman retinde bastaǵan. Keiin Ekonomika jáne biýdjettik josparlaý ministrliginde, Indýstriia jáne saýda ministrliginde, sondai-aq Kólik jáne kommýnikatsiialar ministrliginde túrli jetekshi qyzmetter atqardy.
2006 jyly Astana qalasy Kásipkerlik jáne ónerkásip basqarmasynyń basshysy bolyp taǵaiyndaldy. Al 2016 jyly Astana qalasy ákiminiń orynbasary qyzmetine kóterildi.
Onyń ákesi – Erlan Zairollauly Nyǵmatýllin, tanymal saiasatker jáne ekonomist. Ol Májilis pen Senat depýtaty bolyp qyzmet atqarǵan, ekonomika ǵylymdarynyń kandidaty (1999). Qazirgi ýaqytta “YDD Corporation”, “AsiaFerroAlloys”, “Kaz Silicon”, “EkibastuzFerroAlloys” jáne “Qarajyra” AQ siiaqty iri ónerkásiptik jáne metallýrgiialyq kásiporyndardyń aktsioneri.
Shabdarbaevtar áýleti
Amangeldi Shabdarbaev – Qazaqstannyń arnaiy qyzmet salasyndaǵy eń yqpaldy tulǵalardyń biri. Ol eks-prezident Nursultan Nazarbaevtyń jerlesi. 1974 jyly Qazaq memlekettik dene shynyqtyrý institýtyn támamdaǵannan keiin KGB júiesine qabyldanyp, Dinmuhamed Qonaevtyń jeke kúzetshisi qyzmetin atqarǵan.
Táýelsizdik jyldarynda Shabdarbaev qaýipsizdik organdaryna qaita oralyp, jaýapty laýazymdardy ielendi. 2002 jyly Prezident kúzet qyzmetiniń bastyǵy, al 2006 jyly QR Ulttyq qaýipsizdik komitetiniń tóraǵasy boldy. Keiin Respýblikalyq gvardiiany basqardy.
Amangeldi Shabdarbaevtyń uldary da joǵary memlekettik qurylymdarda eńbek etip júr.
Úlken uly Nurlan Shabdarbaev 2021 jyldyń shildesinen beri Aqtóbe oblysy boiynsha Sybailas jemqorlyqqa qarsy qyzmettiń basshysy qyzmetin atqarady.
Ol eńbek jolyn 1996 jyly Almaty men Almaty oblysy boiynsha Memlekettik tergeý komitetinde jedel ýákil bolyp bastaǵan. Keiin ishki ister organdarynda, ekonomikalyq jáne sybailas jemqorlyq qylmystarymen kúres departamentterinde qyzmet atqarǵan.
Ár jyldary Almaty, Soltústik Qazaqstan jáne Aqtóbe oblystaryndaǵy qarjy politsiiasyn basqardy. 2019–2021 jyldary QR Sybailas jemqorlyqqa qarsy agenttigi tóraǵasynyń orynbasary qyzmetin atqarǵan.
Kishi uly Arlan Shabdarbaev 2016 jyldan beri Pavlodar munai-himiia zaýytynyń (PNHZ) marketing jónindegi bas direktordyń orynbasary qyzmetin atqarady. Buǵan deiin “Rahat-Transservis”, “Arna”, “Halyq banki” siiaqty iri kommertsiialyq jáne qarjy uiymdarynda eńbek etken. Sondai-aq “QazTransOil”, “QazMunaiGaz” jáne “PetroQazaqstan Oil Prodakts” kompaniialarynda basshylyq laýazymdarda bolǵan.
Kárbozovtar áýleti
Qýat Kárbozov – “Qazaqstan astyq konsortsiýmy” JShS bas direktorynyń orynbasary. Ol Qazaq gýmanitarlyq-zań ýniversitetin jáne London biznes mektebin (LSBF) támamdaǵan. Buǵan deiin Qýat Kárbozov Qazaqstannyń Ulybritaniiadaǵy elshiliginde qyzmet atqaryp, keiin “QazMunaiGaz” júiesinde túrli jetekshi laýazymdarda jumys istegen. Atap aitqanda, “QazMunaiGaz” Saýda úiiniń ókildiginde direktordyń orynbasary, “KazMunaiGaz International” (“Rompetrol”) damý departamentiniń direktory, sondai-aq “KPI Inc” kompaniiasynda josparlaý jáne monitoring departamentiniń direktory bolǵan.
Onyń ákesi — general-maior Qozy-Kórpesh Kárbozov, ulttyq qaýipsizdik organdarynyń ardageri, QR Qorǵanys ministrligine qarasty Áskeri-strategiialyq zertteýler ortalyǵynyń prezidenti.
Aita ketsek, 2011 jyly Qozy-Kórpesh Kárbozov QR Kedendik baqylaý komitetiniń tóraǵasy qyzmetinen óz vedomstvosyndaǵy birqatar qyzmetkerdiń tutqyndalýynan keiin otstavkaǵa ketken bolatyn.
Zeinýllinder áýleti
Zeinýllin Talǵat 2013 jyldyń 25 shildesinen beri “Astana” aýyl sharýashylyǵy óndiristik kooperativiniń basqarma tóraǵasy qyzmetin atqarady. Ol eldegi agroónerkásip salasynda tanylǵan tulǵa, otbasymen birge osy baǵytta birneshe jobalardy damytyp keledi.
Talǵat Zeinýllinniń eki uly da memlekettik qyzmette eńbek etedi.
Úlken uly Aian Talǵatuly Zeinýllin — QR Parlamenti Májilisiniń VIII shaqyrylym depýtaty, Ekologiia jáne tabiǵatty paidalaný máseleleri komitetiniń múshesi.
Kishi uly Aivar Zeinýllin, QR Qarjy ministrliginiń Qazynashylyq komiteti tóraǵasynyń orynbasary, Prezidenttik jastar kadr rezerviniń múshesi. Ol Ulybritaniiadaǵy Býkingem ýniversitetin, keiin Qazaqstan ekonomika jáne halyqaralyq saýda ýniversitetin jáne Prezident janyndaǵy Memlekettik basqarý akademiiasyn támamdaǵan. Buǵan deiin Saryarqa aýdany ákiminiń orynbasary qyzmetin atqarǵan.
Áýletke tiesili AiZet Farms kompaniiasy 2014 jyldan beri aýyl sharýashylyǵymen ainalysyp keledi. Negizgi baǵyty astyq óndirý jáne iri qara mal ósirý. Degenmen kompaniianyń aty keiingi jyldary qarjylyq daý-damailarmen jii atalyp júr. Kompra.kz pen Orda.kz taratqan málimetterge súiensek, AiZet Farms-tyń salyqtyq bereshegi 166 mln teńgeden asqan, al sot oryndaýshylaryna tirkelgen qaryz somasy 18,8 mlrd teńge shamasynda. Kompaniianyń atyna 63 sot sheshimi tirkelgeni de kórsetilgen.
Bul málimetterge qaraǵanda, Zeinýllinder áýletiniń agrobiznesi qazir aitarlyqtai qarjylyq qiyndyqqa tap bolǵan. Soǵan qaramastan, kompaniia qyzmetin jalǵastyryp otyr.
Otynshievter áýleti
Meiirjan Otynshiev 2023 jylǵy 30 naýryzdan bastap Almaty qalalyq máslihatynyń tóraǵasy qyzmetinde. Ol eńbek jolyn 2010 jyly Almaty qalalyq Jumyspen qamtý jáne áleýmettik baǵdarlamalar basqarmasynda bastaǵan. Keiin osy basqarmada bólim basshysy, orynbasar, basshy qyzmetterin atqaryp, áleýmettik saiasat salasynda tájiribe jinaqtady.
Sondai-aq Turǵyn úi saiasaty basqarmasy basshysynyń orynbasary, keiin “AMANAT” partiiasynyń Almaty qalalyq filialy tóraǵasynyń birinshi orynbasary jáne atqarýshy hatshysy boldy. 2023 jyly partiia filialynyń tóraǵasy, ári Almaty qalalyq máslihatynyń tóraǵasy bolyp sailandy.
Onyń ákesi Baýyrjan Otynshiev memlekettik qyzmette uzaq jyl eńbek etip, Shymkent jáne batys óńirlerde qyzmet atqardy. Ol eńbek jolyn politsiia salasynan bastap, keiin qarjy politsiiasy qyzmetimen jalǵastyrdy.
Sartovtar áýleti
Qazaqstannyń jańa býyn sheneýnikteriniń qatarynda Qostanai oblysy Altynsarin aýdanynyń ákimi Arnur Sartov ta bar. Ol Prezidenttik jastar kadr rezerviniń múshesi.
Jas sheneýnik Kókshetaý ekonomika jáne menedjment institýtyn, sondai-aq Qazaqstan Respýblikasynyń Prezidenti janyndaǵy Memlekettik basqarý akademiiasyn támamdaǵan. Keiin “Bolashaq” baǵdarlamasy aiasynda AQSh-taǵy Syracuse University ýniversitetinde bilim alyp, halyqaralyq deńgeide tájiribe jinaqtady.
Al ákesi Marat Sartov Qostanai aýdandyq máslihattyń tóraǵasy qyzmetin atqarady.
Dosmuhamedovter áýleti
Bolat Dosmuhambetov 2025 jyldan bastap “Ural Oil and Gas” JShS-niń bas direktory qyzmetine taǵaiyndaldy. Ol munai-gaz salasyndaǵy kásibi jolyn halyqaralyq Weatherfordkompaniiasynan bastap, keiin «Mańǵystaýmunaigaz», «Qazaq munai jáne gaz institýty», KMG Kashagan B.V., Total (Frantsiia) jáne «Isatai Operating Company» siiaqty iri kompaniialarda basshylyq qyzmetter atqarǵan tájiribeli menedjer.
Al ákesi Mahambet Dosmuhambetov 2019–2022 jyldary Atyraý oblysynyń ákimi bolǵan belgili memleket jáne qoǵam qairatkeri. Ol uzaq jyldar boiy munai-gaz salasynda eńbek etip, ministrlik pen ulttyq kompaniialar qurylymynda jaýapty laýazymdar atqarǵan.
