Kompozitor Erkesh Shákeev tuńǵysh balasyn aqtyq saparǵa shyǵaryp salǵan qaraly jiynda jurtty qyzǵanyshtan ada bolyp, jaqyndaryn baǵalai bilýge shaqyrdy.
Búgin Safardyń denesin jer qoinyna tapsyrmas buryn ákesi men dostary, ómirlik ustazdary onyń izgi qasietteri týraly aityp, balalyq shaǵy týraly estelikterimen bólisti. Barlyǵy marqumnyń kózi tirisinde jaqsy adam bolǵanyn tilge tiek etti.
Rásim aiaqtalǵan soń imam jurttyń kózinshe ákesinen “Safardyń myna jalǵanda qaryzy qaldy ma?” dep surady.
Ákesi:
“Balam eshkimge eshnárse qaryz emes. Ol adal ómir súrdi. Basynda jabylmaǵan bir nesiesi bar. Minip júrgen kóligin ózim tóleimin dep nesiege alyp edi. Bul máseleni ózim jyldamyraq retteimin”, — dep jaýap berdi.
Budan keiin imam jinalǵan qaýymnan marqumdy qaryzdary úshin keshirýdi surady.
Odan keiin jinalǵan qaýym aldyna Erkesh Shákeev shyǵyp, balasy týraly tebirene sóz aitty. Qaiǵy jutqan áke sózinen kózine jas almaǵan adam bolmady.
“Safardyń minezi jaily aityp áýre bolmaiyn. Onyń qandai adam bolǵanyn, sýretine qarap-aq bile berseńizder bolady. Memleketimizdiń mundai adamnan aiyrylyp qalǵany ókinishti. Bizge Safar sekildi adamdar aýadai qajet. Dostarym balalaryna “Safardan úlgi alyńdar” dep aitatyn. Meni jaqsy tanityn jandar ómirde túzý jolmen júrip, árdaiym tabandylyq tanytatynymdy biledi.
Jer betinde bireýdiń ala jibin attap, qaryz da alyp kórgen emespin. Nanymdy adal taýyp jedim.
Bul meniń ǵana emes, otbasymnyń da tiregi.
Safardy úlken ómirge daiyndap, sporttyq jarystarǵa qatystyrdym. Bilim alýyna jaǵdai jasap, til úirettim. Onyń ómiri tym qysqa boldy. Biraq juldyzdai bir jarq etkeni anyq. Aramyzda eshbir túsinispeýshilik bolǵan emes. Uzaq otyryp syrlasatynbyz da. Ol maǵan ómirimniń mánin tabýǵa kómektesti.
Dál osy sátti paidalanyp áleýmettik-turmystyq jaǵdaiyma qatysty málimdeme jasaǵym kelip tur. Ózim ashyp oqymasam da, kei adam men basylymdar Safar týraly jaǵymsyz dúnie jazǵanyn estidim.
Ony “ákesiniń arqasynda ómir súrip júrgen erke ul” depti. Joq, men eshqandai da millioner emespin.
Safar kózi tirisinde de “Áke, jurt sizdi dostaryńyzǵa qarap millioner dep oilaidy” deýshi edi. Men olarmen aqshasy úshin emes, tek adamgershilikteri úshin ǵana dos bolamyn ǵoi. Biz qarapaiym otbasymyz. Áielim Janna azyq-túlikti Magnýmnen baryp satyp alady. Ózderińiz oilap kórińizdershi, millionerler dál sondai jerge bara ma?
Ata-analar, balalaryńyz kimmen dostasyp júrgenine nazar aýdaryńyzdar. Safar sońǵy kezde kóptegen kezdesýge baryp, ózi barmaýy tiis jerde júrgen bolar.
Biraq, onyń shynaiy dostary altyn adamdar. Jandary jaqsylyqqa qumar balalar.
Ony izdeýge kómekteskenderi úshin de kóp rahmet. Táýligine 1,5 saǵat qana uiyqtap, súrinip-jyǵylǵansha izdedi.
Ómir osymen toqtap qalmaidy. Ol ary qarai da jalǵasa beredi. Otbasym meni eshnárse de syndyra almaitynyn túsinýi tiis. Ras, ómirimniń máni ketkendei kúide turmyn. Kúni keshe ataqty Elton Djonnyń áriptesterimen birge án jazyp jatqan bolatynbyz. Qazir sonyń barlyǵy qajetsiz bolyp qalǵandai.
Meniń basymdaǵy jaǵdai sizderge sabaq bolýy tiis. Ómirde mahabbattan ózgesiniń bári beker.
Osyny túsinińizder. Qyzǵanyshqa jol bermeńizder. Bireýge degen qyzǵanyshyńyz ózińizge degen syi-qurmetsizdigińiz.
Jýyrda din ókilderinen Safarǵa duǵa oqýlaryn suraǵan edim. Ol tabylmasa da, qoǵam tazalyqtyń ne ekenin túsinsinshi degen oi turdy. Meniń dál osylai aitýǵa quqyǵym bar. Óitkeni búgin men ómirimde eń úlken sabaq aldym, soqqy aldym”.
Kompozitor ómirinde balalarynyń ólimine kýá bolýdan qoryqqan eken. Jubaiy ekeýi osy kúnge deiin tórt bala tárbielegen.
Derekkóz: stan.kz
Басты беттегі сурет Nur.kz сайтынан алынды
