Óndiris ornynyń ashylýyna beine bailanys rejiminde Qazaqstan Respýblikasynyń Premer-Ministri Álihan Smaiylov, MOL Group kompaniiasynyń barlaý jáne óndirý jónindegi atqarýshy vitse-prezidenti Jombor Marton, Sinopec International Petroleum Exploration & Production Corporation kompaniiasynyń basqarma tóraǵasy Go Iýelian qatysty. Ken ornyn Batys Qazaqstan oblysynyń ákimi Nariman Tóreǵaliev, «QazMunaiGaz» UK» AQ-nyń basqarma tóraǵasy Maǵzum Myrzaǵaliev, MOL Group Resei/Qazaqstan bas direktory Evgenii Lapshin jáne First International Oil Corporation Limited (Sinopec kompaniiasynyń enshiles kásiporny) kompaniiasynyń vitse-prezidenti Chjao Venmin saltanatty túrde iske qosty.
– Memleket basshysy Qasym-Jomart Kemeluly Toqaevtyń jańa ken oryndaryn barlaý, olarǵa investitsiia tartý týraly tapsyrmasyn iske asyrý aiasynda júzege asyp jatqan bul jobanyń strategiialyq mańyzy zor. 530 million AQSh dollary kóleminde investitsiia tartylǵan Rojkov ken orny tabiǵi gaz kóleminiń qosymsha kózi bolady. Ken ornynda óndiriletin shikizat «Jaiyqmunaigaz» kompaniiasynyń qýattylyǵynda óńdeletin bolady. Joba sheteldik seriktestermen birlese otyryp júzege asyrylady. Bul ozyq halyqaralyq tájiribeni eskere otyryp qajetti jobalyq sheshimderdi daiyndaý men engizýde qoldanýǵa múmkindik berdi.
Budan basqa 12 halyqaralyq kompaniiamen birlesip, perspektivalyq, geologiialyq barlaý júrgizýge jáne qoldanystaǵy ken oryndaryn qosymsha barlaýǵa arnalǵan jobalar pysyqtalýda. Elimizde halyq sany men ónerkásiptiń ósýi gaz resýrstaryn óndirý jáne óńdeý qýatyn arttyrýdy talap etedi. Memleket basshysy 2030 jylǵa deiin taýarlyq gaz óndirisiniń kólemin 30 mlrd tekshe metrge deiin jetkizý jóninde maqsat qoiyp otyr. Osyǵan bailanysty Qashaǵan men Qarashyǵanaq ken oryndarynda jáne Jańaózen qalasynda jańa gaz óńdeitin zaýyttar salynady, – dedi Qazaqstan Respýblikasynyń Premer-Ministri Álihan Smaiylov.
Saltanatty jiynda Sinopec International Petroleum Exploration & Production Corporation kompaniiasynyń basqarma tóraǵasy Go Iýelian tikelei transliatsiia arqyly aspan asty elinen sálem joldady. «Sinopec kompaniiasynyń atynan Rojkov gaz ken ornynda resmi túrde kommertsiialyq óndirý jumysynyń bastalýymen shyn júrekten quttyqtaimyn. Qazaqstan Úkimetine jumys barysynda turaqty qoldaý kórsetip kelgeni úshin, sonymen birge operatsiialyq kompaniianyń («Oral Oil end Gaz» JShS) basshylaryna atqarylǵan jumys úshin shynaiy rizashylyǵymdy bildiremin», – dedi qytailyq kompaniiasynyń basqarma tóraǵasy Go Iýelian.
Vengriia astanasy – Býdapshetten beinebailanys arqyly sóilegen MOL Group kompaniiasynyń barlaý jáne óndirý jónindegi atqarýshy vitse-prezidenti Jombor Marton birlesken jobanyń bolashaǵy zor ekenin aitty. «Biz Qazaqstan men Majarstan úkimetiniń MOL kompaniiasynyń qazaqstandyq munai-gaz sektoryndaǵy qyzmetin ekonomikalyq jobalar aiasynda eki el arasyndaǵy yntymaqtastyqtyń ozyq úlgisi retinde moiyndaǵanyn joǵary baǵalaimyz. MOL jáne «Oral Oil end Gaz» komandasyna, sondai-aq seriktesterimizge, eki eldiń úkimetine birlesken jumys úshin alǵys bildiremin», – dep atap ótti Jombor Marton.
«QazMunaiGaz» UK AQ-nyń basqarma tóraǵasy Maǵzum Myrzaǵaliev bul joba Batys Qazaqstan oblysynyń áleýmettik-ekonomikalyq damýyna yqpal etedi dep esepteidi.
«Oral Oil end Gaz» JShS-nyń jumystary men qyzmetterindegi jergilikti qamtý úlesi kem degende 74% quraidy. Jobaǵa qurylys kezinde 450-den astam adam jumyldyrylyp, 80 turaqty jumys orny ashyldy. «Byltyr qazan aiynda energetika salasyn damytý jónindegi keńeste Memleket basshysy taýar gazy óndirisiniń kólemin arttyrýdy tapsyrdy. Biz biyl mamyr aiynda Ońtústik Aqsai ken ornyn, jeltoqsan aiynyń basynda Shyǵys Óriktaý ken ornyn iske qostyq, al jyl sońynda Rojkov ken ornyn paidalanýǵa berip otyrmyz», – dedi Maǵzum Myrzaǵaliev.
Ken ornynda jylyna shamamen 1 mlrd tekshe metr gaz, 500 myń tonnadan astam kondensat óndiriledi, al suiytylǵan kómirsýtekti gaz óndirisiniń deńgeii 150 myń tonnaǵa jetedi. Ken ornynan alynǵan shiki gaz «Jaiyqmunaigaz» JShS gaz óńdeý kásipornyna beriledi, óńdelgen taýar gazy ishki naryqqa jetkiziledi. «QazMunaiGaz» UK AQ-nyń basqarma tóraǵasy Maǵzum Myrzaǵaliev bastapqyda bul jobany iske qosý ońai bolmaǵanyn, jumys barysynda kedergilerdi birtindep eńsergenin jetkizdi. Basqarma tóraǵasy Mańǵystaý men Atyraý oblystaryndaǵy munai-gaz ken oryndaryn damytý josparda bar ekenin jetkizdi.
– Bul jobanyń elimiz úshin, onyń ishinde bizdiń oblys úshin mańyzy óte zor. Batys Qazaqstan oblysynda kóktem men kúz ailarynda jáne qys kezinde suiyltylǵan gaz tapshylyǵy týyndaidy. Basqa óńirlerdegi kásiporyndardan suiyltylǵan gaz ýaqtyly jetkizilmei, aýtogaz quiatyn beketter qiyndyqqa dýshar bolyp jatady. Endi shikizat tabý máselesi Rojkov ken orny esebinen sheshiledi. Zaýytta jergilikti turǵyndar jumysqa alynady. Oblystyń áleýmettik-ekonomikalyq damýyna oń áser etetin joba dep esepteimin, – dedi Batys Qazaqstan oblysynyń ákimi Nariman Tóreǵaliev.
Rojkov ken orny Báiterek aýdanynyń aýmaǵynda, Oral qalasynan soltústik-shyǵysqa qarai 70 shaqyrymda Jaiyq ózeniniń oń jaǵalaýynda ornalasqan. Onyń mańynda Chebotarevo, Petrovo, Hamino eldi mekenderi bar.
2024 jyly shamamen 318 mln tekshe metr shiki, 263 myń tonna kondensat jáne 44 myn tonna suiytylǵan kómirsýtek gazy (SKG) óndirý josparlanýda. «Rojkov gazkondensat ken orny 2008 jyly ashyldy. Shikizat óndirý úshin toǵyz uńǵyma qazyldy. Qazirgi ýaqytta bir uńǵyma jumys istep tur. 2024 jyldyń 7-8 aiynda tórt uńǵymany iske qosamyz degen jospar bar. Ken ornynyń qorynda 12,5 mln. tonna kondensat, 26,9 milliard tekshe metr shiki gaz bar. Kásiporynǵa meilinshe jergilikti turǵyndardy jumysqa tartýdamyz», – dedi «Oral Oil end Gaz» JShS-nyń bas direktory Daniiar Orazbaev.
Nurtai ALTAIULY
Dalanews.kz saity
