Batys Qazaqstan oblysynda alǵash ret mádeniet salasynda aýqymdy jańǵyrý jobasy júzege asyrylýda. «Qazaqstan halqyna» qory men jergilikti ákimdik birlesip, 25 aýyldyq kitaphanany jańǵyrtý isin qolǵa aldy, – dep habarlaidy Dalanews.kz
Bul igi bastama elimizdegi mádeni infraqurylymdy jańartýǵa baǵyttalǵan alǵashqy jobalardyń biri. Batys Qazaqstan oblysynda búginde 357 memlekettik kitaphana jumys istese, onyń 333-i aýyldyq jerde ornalasqan. Sonyń ishinde 6 aýdandyq jáne 19 aýyldyq kitaphana jańǵyrtý jobasyna iriktelip alyndy.
Joba aiasynda arnaiy jumys toby kitaphanalarmen tanysyp, olardyń erekshelikterin eskere otyryp dizain jobalar daiyndady, paidalanýshylardyń usynys-talaptaryn nazarǵa alyp, tehnikalyq tapsyrmalar jasaldy.
Jóndeý jumystary oblys ákimdiginiń qoldaýymen júrgizilýde. Bul maqsatta jergilikti biýdjetten jáne «Qazaqstan halqyna» qoǵamdyq qory tarapynan qarajat bólinip, zamanaýi qural-jabdyqtar men jihazdar satyp alyndy. Onyń ishinde ár kitaphanaǵa 800-den astam kitap, jalpy sany 20 195 dana jańa kitap qorymen tolyqtyryldy.
Jobanyń negizgi maqsaty — aýyl kitaphanalaryn tek kitap oqý orny emes, jergilikti qaýymdastyqtyń damýyna serpin beretin kópfýnktsionaldy mádeni ortalyqtarǵa ainaldyrý. Bul baǵytta kitaphanalarda IT aimaqtar, konferents zaldar, kinozaldar, shyǵarmashylyq jáne demalys keńistikteri qurylyp, túrli úiirmeler men is-sharalarǵa jol ashyldy.
2024 jyldyń jeltoqsanynan 2025 jyldyń sáýirine deiin Jańaqala, Báiterek, Terekti, Aqjaiyq, Bórli, Kaztalov, Qaratóbe, Syrym, Tasqala aýdandaryndaǵy 14 aýyldyq kitaphana qaita jańǵyrtylyp, paidalanýǵa berildi. Al 2025 jyldyń mamyrynda taǵy 6 aýyldyq kitaphana el igiligine usynylady. Joba 25 maýsymda Taipaq jáne Shapovo aýyldyq kitaphanalarynyń ashylýymen óz máresine jetpek.
Jańǵyrtylǵan kitaphanalarda dybys jazý stýdiiasy men bi zaly da iske qosylyp, jastardyń shyǵarmashylyǵyn shyńdaityn, jańa ideialardy júzege asyratyn ortalyqqa ainalyp otyr. Sonymen qatar, kitaphana qyzmetkerleri Almaty qalasynda «Tana» qory uiymdastyrǵan biliktilik arttyrý kýrsynan ótti.
Búginde jańǵyrtylǵan kitaphanalarda túrli úiirmelerge, shyǵarmashylyq alańdarǵa qatysýshylar sany artyp keledi. Aýyl turǵyndary úshin bul keńistikter ózara qarym-qatynas qurýǵa, rýhani jáne kásibi damýǵa, zamanaýi aqparattyq resýrstarǵa qol jetkizýge múmkindik berip otyr.
Aýyl kitaphanalary — endi tek kitap oqityn oryn ǵana emes, aýyl ómiriniń mádeni-rýhani júregine ainalýda.
