Abai oblysynyń ákimi Berik Ýáli Sý resýrstary jáne irrigatsiia ministri Nurjan Nurjigitovpen kezdesti, - dep habarlaidy Dalanews.kz
Salalyq basqarma basshysy, óńirdegi sý sharýashylyǵy qurylymdarynyń ókilderi qatysqan jiynda aimaqtaǵy sýarmaly jerlerdiń kólemin arttyrý, jańa sý qoimalaryn salý jáne sý infraqurylymyn jańǵyrtý máseleleri talqylandy.
2024-2028 jyldar aralyǵynda oblystyń Úrjar, Maqanshy, Aqsýat, Kókpekti aýdandarynda sý qoimalaryn salý josparlanǵan. Joba iske asqan jaǵdaida sýarmaly jerler orta eseppen 100 myń gektarǵa deiin ulǵaiady. Bul óńirdegi agrosektordyń damýyna, ónim kóleminiń artýyna jáne jergilikti turǵyndardy jumyspen qamtýǵa múmkindik beredi.
Sý resýrstary jáne irrigatsiia ministri kezdesýde joǵaryda atalǵan sý qoimalaryn Islam damý banki arqyly qarjylandyrýǵa múmkindik bar ekenin jetkizdi.
«Sizderdiń taraptaryńyzdan jobalyq-smetalyq qujattar ázirlense, jobalardy bastaýǵa bolady. Bul sý qoimalaryn salý Qazaqstan Respýblikasynyń sý salasyn damytýdyń 2028 jylǵa deiingi keshendi josparyna engen. Jańa sý qoimalarynyń qurylysy halyqtyń ál-aýqatyn arttyryp, óńirdiń ekonomikasyn damytýǵa úles qosady, jergilikti sharýalardy sýmen turaqty túrde qamtamasyz etýge múmkindik beredi», - dedi Nurjan Nurjigitov.
Oblys ákimi sý qoimalaryn salý óńir turǵyndary úshin ózekti másele ekenin atap ótti.
«Bizdiń oblys aýyl sharýashylyǵyna beiim. Joǵaryda atalǵan jospardaǵy sý qoimalary salynsa aimaqtyń aýyl sharýashylyǵyna tyń serpin berip, sýarmaly jerlerdiń kólemin ulǵaitýǵa múmkindik týady. Oblys sharýalary bul máseleni jii kóteredi. Sondyqtan Sý resýrstary jáne irrigatsiia ministrligimen birlese jumys isteýge daiynbyz», - dedi aimaq basshysy.
