Qarashyǵanaq ken ornynda qýattylyǵy jylyna 4 mlrd tekshe metr gaz óńdeý zaýyty salynady. Bul týraly Ortalyq kommýnikatsiialar qyzmetinde ótken brifingte Batys Qazaqstan oblysynyń ákimi Nariman Tóreǵaliev aitty, – dep habarlaidy Dalanews.kz BQO ákiminiń baspasóz qyzmetine silteme jasap.
Batys Qazaqstan oblysynda óndiris salasy turaqty damyp keledi. Óńir basshylyǵy investitsiia tartý arqyly óndiris oryndaryn ashyp, otandyq jáne jergilikti ónim túrlerin kóbeitýdi basty nazarǵa qoiyp otyr.
Respýblika kúni qarsańynda munai gaz salasyna qajetti keibir jabdyqtardy óndiretin zaýyt iske qosylyp, shikizat óndirisine qajetti qural-jabdyqtar óndirile bastady.
Óńirde ónerkásip kólemin arttyrý baǵytynda Qarashyǵanaqty keńeitý jobasy iske asyrylýda. Ótken jyly 4-shi kompressor, aǵymdaǵy jyly 5-shi kompressor paidalanýǵa berildi. Al, 6-shi kompressordyń qurylysy aiaqtalýǵa jaqyn.
Atalǵan joba Qarashyǵanaq ken ornyndaǵy shiki gazdy daiyndaý, keri aidaý jáne gazdy óndirý kólemin ulǵaitýǵa baǵyttalǵan.
Aldaǵy ýaqytta Qarashyǵanaq ken ornynda qýattylyǵy jylyna 4 mlrd tekshe metr gaz óńdeý zaýytyn salý josparlanýda. Qazir osy baǵytta jumystar atqarylýda. Bolashaqta jańa gaz óńdeý zaýytynyń iske qosylýy turǵyndardy, elde óndirilgen taýar gazymen qamtamasyz etýge serpin beredi.
