Astanada qurylys nysandarynyń birinde er adam biik krannyń basyna shyǵyp, eldi dúrliktirdi. Onyń bul áreketine Astana ákimdigi túsinikteme berdi, dep habarlaidy Dalanews.kz.
Álemjelide taraǵan videoda er adam Joǵarǵy sottyń sheshimine narazylyǵyn bildirgen.
Astana ákimdiginiń habarlaýynsha, kranǵa shyǵyp alǵan “Er-Taý” kompaniiasynyń basshysy M.Tasov degen azamat. Ol 2017 jyly “Shavgar” TK qurylysshysy bolyp, 2017 jyly turǵyn úidiń irgetasy men birinshi qabatyn salǵan. Biraq úleskerler áli kúnge deiin óz páterlerin kútýmen júrgen.
“Qala ákimdiginiń vedomstvoaralyq komissiiasynyń (VAK) sheshimi negizinde Astana qalasy Saryarqa aýdanynyń prokýratýrasy nysandy úleskerlerge berý týraly sotqa talap aryz berdi. 20.10.2023 j. Astana qalasynyń mamandandyrylǵan aýdanaralyq ekonomikalyq sotynyń sheshimimen jer ýchaskeleri bar qurylys nysany “Astana Siti 2023” úleskerlerine berildi. 05.07.2024 j. Joǵarǵy sottyń azamattyq ister jónindegi sot alqasynyń qaýlysymen jer ýchaskeleri bar qurylys nysany “Astana Siti 2023” úleskerleri úshin qaldyryldy”, - deidi ákimdikten.
M.Tasov nysandy zardap shekken úleskerlerge berý týraly bul sheshimmen kelispegen.
“Barlyq qyzmet ornynda boldy. Aýdan, qalalyq orta sapasy men baqylaý basqarmasynyń ókilderi, zańgerler túsinikteme berdi. Alynǵan túsiniktemelerden keiin M. Tasov munara kranynan ketti. Sondai-aq, onyń qatysýymen qosymsha VAK otyrysy ótkiziledi”, - deidi ákimdik.
