Almaty oblysy İshki saıasat basqarmasynyń basshysy Erlan Jaqypov bir jarym aı bolmaı qyzmetinen ketti, dep habarlaıdy Dalanews.kz.

Bul týraly redaksıaǵa derekkóz habarlady. İshki saıasat basqarmasynyń resmı saıtynda da basshylyqqa qatysty eshqandaı aqparat berilmegen. Tek eki orynbasary kórsetilgen.

Aıta keteıik, Erlan Jumashuly Baǵanashyl balalar úıine qatysty daýdan soń qyzmetten ketken Erik Abıtovtiń ornyna kelgen. Erlan Jaqypov buǵan deıin Shyǵys Qazaqstan oblysynda laýazymdy qyzmetter atqarǵan, Óskemen qalasy ákiminiń orynbasary, AMANAT partıasy Almaty oblystyq fılıalynyń atqarýshy hatshysy bolǵan. 

Jýrnalıs Ardaq Aıbaruly bul aýys-túıistiń sebebin bylaı dep kórsetipti.

"Ólgendi de estirtedi", – deıdi ǵoı. Basshy turaqtamaıtyn ishki saıasat basqarmasy "Samǵaýdy" bul joly da qorǵaı almapty. Oblys basshysynyń jańadan taǵaıyndaǵan adamy 1,5 aı jumys istep, "doktorantýraǵa tústim" degen jeleýmen qyryq syltaýyn aıtyp, qyzmetinen ketip qalǵan. Árıne, bul ákimge úlken mınýs. Erik Áziljanuly Baǵanashyldaǵy balalar úıine qatysty shyqqan daý-damaıdan soń qyzmetimen qosh aıtysqan kezde "Jetisý oblysynan Aıdar Karbozuly Bashbaevtyń kandıdatýrasyn usynyńyzdarshy osy qyzmetke", – dep, aıtýdaı-aq aıttyq. Biraq estir qulaq bolmady. Mine, endi araǵa az ǵana ýaqyt salyp, sol sózdi taǵy qaıtalaýǵa týra kelip tur..." - dep jazdy ol.

Rasynda da, ákimdik tarapynan ázirge Erlan Jaqypov qyzmetinen ketkeni jóninde resmı aqparat bolmady.