Kremlde Resei men AQSh delegatsiialary Ýkrainadaǵy soǵysty beibit jolmen retteý máselesi boiynsha kelissóz júrgizdi, dep habarlaidy Dalanews.kz.
Kezdesý 3 jeltoqsanǵa qaraǵan túni ótip, bes saǵattan asa ýaqytqa sozylǵan. Resei jaǵynan kelissózge Vladimir Pýtin, prezident kómekshisi Iýrii Ýshakov jáne arnaiy ókil Kirill Dmitriev qatysqan. AQSh delegatsiiasyn prezidenttiń arnaiy ókili Stiven Ýitkoff pen Donald Tramptyń kúieý balasy Djared Kýshner bastap barǵan.
Pýtinniń kómekshisi Iýrii Ýshakovtyń aitýynsha, taraptar soǵysty toqtatý boiynsha birneshe nusqany qarastyrǵan, biraq ázirge ortaq sheshimge kele almaǵan.
"Degenmen AQSh usynǵan keibir usynysty talqylaýǵa bolady. Al keibiri bizge múlde sáikes kelmeidi. Jumys jalǵasady", – dedi Ýshakov.
Ol Pýtinniń Vashingtonnyń kei usynysyn synǵa alǵanyn, ásirese, aýmaqtyq máseleler boiynsha kelispeýshilikter baryn atap ótti. Soǵan qaramastan, Ýshakov kezdesýdi "mazmundy jáne paidaly" dep baǵalady.
Kelissóz jabyq formatta ótken. Taraptar onyń mazmunyn jariia etpeýge ýaǵdalasqan. AQSh delegatsiiasy nátijeler týraly Donald Trampqa tikelei baiandap, keiin Máskeýmen telefon arqyly bailanys ornatpaq.
Osy ýaqytta Ýkraina prezidenti Vladimir Zelenskii Telegram arnasynda "soǵystyń aiaqtalýyna qatysty jeńil sheshimder bolmaitynyn" málimdedi. Ol AQSh delegatsiiasynyń Máskeýdegi kelissózinen keiingi pozitsiiasyn kútetinin, sebebi sol Kievtiń kelesi qadamdaryn anyqtaitynyn aitty.
Sondai-aq, ol aldaǵy ýaqytta AQSh delegatsiiasymen jáne Donald Tramppen jeke kezdesý ótkizýi múmkin ekenin joqqa shyǵarmady.
