كرەملدە رەسەي مەن اقش دەلەگاسيالارى ۋكرايناداعى سوعىستى بەيبىت جولمەن رەتتەۋ ماسەلەسى بويىنشا كەلىسسوز جۇرگىزدى، دەپ حابارلايدى Dalanews.kz.

كەزدەسۋ 3 جەلتوقسانعا قاراعان ءتۇنى ءوتىپ، بەس ساعاتتان اسا ۋاقىتقا سوزىلعان. رەسەي جاعىنان كەلىسسوزگە ۆلاديمير پۋتين، پرەزيدەنت كومەكشىسى يۋريي ۋشاكوۆ جانە ارنايى وكىل كيريلل دميترييەۆ قاتىسقان. اقش دەلەگاسياسىن پرەزيدەنتتىڭ ارنايى وكىلى ستيۆەن ۋيتكوفف پەن دونالد ترامپتىڭ كۇيەۋ بالاسى دجارەد كۋشنەر باستاپ بارعان.

ءپۋتيننىڭ كومەكشىسى يۋريي ۋشاكوۆتىڭ ايتۋىنشا، تاراپتار سوعىستى توقتاتۋ بويىنشا بىرنەشە نۇسقانى قاراستىرعان، ءبىراق ازىرگە ورتاق شەشىمگە كەلە الماعان.

"دەگەنمەن اقش ۇسىنعان كەيبىر ۇسىنىستى تالقىلاۋعا بولادى. ال كەيبىرى بىزگە مۇلدە سايكەس كەلمەيدى. جۇمىس جالعاسادى"، – دەدى ۋشاكوۆ.

ول ءپۋتيننىڭ ۆاشينگتوننىڭ كەي ۇسىنىسىن سىنعا العانىن، اسىرەسە، اۋماقتىق ماسەلەلەر بويىنشا كەلىسپەۋشىلىكتەر بارىن اتاپ ءوتتى. سوعان قاراماستان، ۋشاكوۆ كەزدەسۋدى "مازمۇندى جانە پايدالى" دەپ باعالادى.

كەلىسسوز جابىق فورماتتا وتكەن. تاراپتار ونىڭ مازمۇنىن جاريا ەتپەۋگە ۋاعدالاسقان. اقش دەلەگاسياسى ناتيجەلەر تۋرالى دونالد ترامپقا تىكەلەي بايانداپ، كەيىن ماسكەۋمەن تەلەفون ارقىلى بايلانىس ورناتپاق.

وسى ۋاقىتتا ۋكراينا پرەزيدەنتى ۆلاديمير زەلەنسكيي Telegram ارناسىندا "سوعىستىڭ اياقتالۋىنا قاتىستى جەڭىل شەشىمدەر بولمايتىنىن" مالىمدەدى. ول اقش دەلەگاسياسىنىڭ ماسكەۋدەگى كەلىسسوزىنەن كەيىنگى پوزيسياسىن كۇتەتىنىن، سەبەبى سول كييەۆتىڭ كەلەسى قادامدارىن انىقتايتىنىن ايتتى.

سونداي-اق، ول الداعى ۋاقىتتا اقش دەلەگاسياسىمەن جانە دونالد ترامپپەن جەكە كەزدەسۋ وتكىزۋى مۇمكىن ەكەنىن جوققا شىعارمادى.