Almatyda Ishki ister ministrligi akademiiasynyń 18 jastaǵy kýrsanty burynǵy súiiktisin dalaǵa aparyp, kólik beldigimen býyndyrmaq boldy degen aiypqa ilikti. Zardap shegýshi 17 jastaǵy Elina oqiǵanyń qalai bolǵanyn aityp bergen, dep habarlaidy Dalanews.kz.
KTK telearnasynyń málimetinshe, qyzdyń sózinshe, senbi keshinde Biǵali esimdi jigit ony qala shetine aparyp, uryp-soqqan, beldikpen qinamaq bolǵan. Qorqytý áreketi shekten shyqqan: jigit qyzdy órtep jiberemin dep qorqytqan. Elina munyń bárine qyzǵanysh sebep boldy deidi.
«Kólikten qashyp shyqqanymda, ol arttan qýyp jetip, qolmen kóterip, aiaqpen tepti: qabyrǵa, ish, arqaǵa. Jerge qulaǵan kezde aiaq kiimimdi dalaǵa shashty. Keiin «it, taýyp kel» dep aiqailady», – deidi qyz.
Elina men Biǵali segizinshi synyptan birge bolyp, qarym-qatynas tórt jylǵa sozylǵan. Qyzdyń aitýynsha, buryn da jigit jii qol kótergen. Ajyrasý týraly aitqanda, ol Elinanyń ózine jáne otbasyna ziian keltiretinin eskertken.
«Meni shashymnan súirep, jermen súirep mashinaǵa apardy. Tyrnaǵymmen topyraqty tyrnap, toqtaýǵa tyrystym. Mashinaǵa otyrǵanda beldikpen qylǵyndyrmaq boldy. Ákemdi, ápkemdi óltiremin dep qorqytty», – deidi Elina.
Qyzdyń ata-anasy onyń mi shaiqalýyna jáne dene jaraqattaryna kúmán keltirmeidi. Olar birden politsiiaǵa aryz túsirgen, alaida Biǵalidiń anasy aryzdy qaitaryp alýǵa kóndirgen.
«Anasy kelip, «Ekeýi de kináli, súigen soń solai bolady. Ol ózi sondai adam» dedi. Biz aqymaqtyqpen aryzdy aldyq. Endi qyzymnyń janyna jolatpaimyz», – deidi Elinanyń anasy.
Politsiiada qyz ben oqiǵaǵa qatysy bar adamdardan jaýap alynǵan. Alaida aryzdyń qaitaryp alynýy jáne sot-meditsinalyq saraptamadan bas tartylýyna bailanysty is toqtatylǵan. Almaty PD habarlamasynda:
«Jábirlenýshi ata-anasymen birge aryz berýden jáne sot-meditsinalyq saraptamadan ótýden bas tartty. Kórinetin jaraqat tirkelmedi. Osy jaǵdailardy eskerip, is zań tártibimen toqtatyldy», – delingen.
Kýrsanty IIM akademiiasynan shyǵaryp jibergen. Elina ambýlatoriialyq em qabyldap jatyr. Ata-anasy qaitadan politsiiaǵa aryz túsirip, kináli adamdy jaýapqa tartýdy talap etýde.
